اسمبلی دا اجلاس ہورہا ہوئے تے گورنر راج نہیں لگ سکدا:وزیراعلی پنجاب

لہور( پنجابی میڈیاگروپ)وزیراعلی پنجاب چودھری پرویز الٰہی نے آکھیا اے کہ اپوزیشن اقلیت وچ اے تے اقلیت وچ ہی رہے گی، اپوزیشن والے صرف نعرے لا سَکدے نیں،عدم اعتماد لیانا اینہاں دے وَس دی گل نہیں ۔ تحریک عدم ا عتماد دا جس نوں شوق اے، اوہ لے آئے۔ اسمبلی ان سیشن ہوئے تے تحریک عدم اعتماد اُتے ووٹنگ نہیں ہوسکدی تے نہ ہی اعتماد دا ووٹ لین دا آکھیا جاسکدا اے ۔ وزیراعلی پنجاب نال پاکستان براڈکاسٹرز ایسوسی ایشن دے وفد نے ملاقات کیتی، وفد وچ چیئرمین شکیل مسعود حسین،سیکرٹری جنرل میاں عامر محمود، ناز آفرین سہگل تے چیئرمین نئی بات میڈیا نیٹ ورک چوہدری عبدالرحمان شامل سن ۔ملاقات وچ پاکستان براڈ کاسٹرز ایسوسی ایشن دے مسائل دے حل بارے گل بات کیتی گئی، وزیراعلی دی ایسوسی ایشن نوں واجبات دی چھیتی ادائیگی اُتے یقین دہانی کروائی گئی، صوبائی سیکرٹری اطلاعات آصف بلال لودھی،سابق پرنسپل سیکرٹری وزیراعلی جی ایم سکندر،پریس سیکرٹری وزیراعلی اقبال چودھری، ڈی جی پی آر افراز احمد وی ایس موقع اُتے موجود سن۔