حکومتی مشکل فیصلیاں نال ملک ڈیفالٹ دے خطرے توں باہر نکل چُکیا اے:وزیراعظم

اسلام آباد( پنجابی میڈیا گروپ)وزیراعظم شہباز شریف نے آکھیا اے کہ اتحادی حکومت دے مشکل فیصلیاں دی بدولت ملک ڈیفالٹ دے خطرے توں نکل چُکیا اے، معیشت بارے بے بنیاد ہیجانی کیفیت پیدا کرن دی مزموم کوشش کیتی جا رہی اے ۔ وزیرِ اعظم نال معروف عالمی انویسٹمنٹ بینکنگ اینڈ کیپیٹل مارکیٹس فرم جیفریز دے وفد نے ملاقات کیتی، جس ملاقات وچ وزیرِ خزانہ اسحاق ڈار وی رِلتی ہوئے۔ وفد دا خیرمقدم کردیاں ہویاں وزیراعظم نے فرم نوں پاکستان وچ اپنا دفتر کھولن دی دعوت دتی ۔ وفد نے وزیراعظم دی قیادت وچ پاکستان دی معاشی بحالی نوں اک چنگی علامت قرار دتا جس نے معاشی چیلنجاں دا موثر انداز وچ مقابلہ کیتا تے ملک نوں معاشی استحکام دی راہ اُتے گامزن کیتا ۔ ملاقات دے دوران شہباز شریف نے آکھیا کہ حکومت ملکی معیشت نوں مضبوط کرن لئی ہر ممکن اقدام کر رہی اے، اتحادی حکومت دے مشکل فیصلیاں دی بدولت ملک ڈیفالٹ دے خطرے توں نکل چکیا اے، پاکستان دی معاشی صورتحال بارے غلط معلومات پھیلائی جارہی اے، معیشت بارے بے بنیاد ہیجانی کیفیت پیدا کرن دی مزموم کوشش کیتی جارہی اے۔اوہناں نے آکھیا کہ اتحادی حکومت نے سیاسی قیمت دی پرواہ کیتوں بغیر ملک نوں پچھلے 4 سال دیاں نااہلیاں دا خمیازہ بھگتن توں بچا لیا، حکومت مہنگائی نوں گھٹ کرن تے عام آدمی دے ریلیف لئی ترجیحی بنیاداںاُتے اقدام کر رہی اے، حکومت بیرونی تجارتی خسارہ گھٹ کرن لئی کوشاں اے، بیرونی سرمایہ کاری دے ودھا لئی حکومت سرمایہ کاراں نوں ہر ممکن سہولت فراہم کر رہی اے۔