جیے بھٹو دا نعرہ لا کے سلیکٹڈ راج نوں خدا حافظ آکھیا : بلاول بھٹو

کراچی( پنجابی میڈیا)پاکستان پیپلز پارٹی (پی پی پی)دے چیئرمین تے وزیر خارجہ بلاول بھٹو زرداری ہوراں آکھیا کہ آزاد کشمیر دے جیالیاں نیازی دی نک تھلے بلدیاتی الیکشن جِتیا، اسین جیے بھٹو دا نعرہ لا کے آمراں تے سلیکٹڈ راج نوں خدا حافظ آکھیا۔پاکستان پیپلزپارٹی دے55ویں یوم تاسیس اُتے مرکزی تقریب نال خطاب کردیاں ہویاں بلاول بھٹو نے آکھیا کہ اج کراچی دی تنظیم، عہدے داراں نے سادا دل جِت لیا اے، نشتر پارک کراچی دے شہریاں نال بھریا ہویا اے، ایسی شہر توں جیالا ناظم منتخب ہوئے گا، پیپلز پارٹی وفاق دی جماعت اے، ساڈا وی حق اے کہ کراچی دے میئر نوں منتخب کریئے ،کشمیر دے جیالیاں نیازی دی نَک تھلے بلدیاتی الیکشن جِتیا ۔ وزیر خارجہ نے ہور آکھیا کہ پیپلز پارٹی نوں عوام دی خدمت کردیاں55ورھے ہوگئے، اسیں جیے بھٹو دا نعرہ لاندیاں اک نہیں بلکہ 3آمراں نوں نٹھایا ، پیپلز پارٹی نے ہر طبقے نوں معاشی انصاف دلایا ،پیپلزپارٹی نفرت نہیں اُمید دی سیاست اُتے یقین رکھدی اے، پی پی انتشار دی سیاست نہیں یکجہتی دی سیاست اُتے یقین رکھدی اے، پیپلز پارٹی ملک نوں جوڑدی اے چاراں صوبیاں دی زنجیر اے ۔ اوہناں نے ہور آکھیا کہ بھٹو نے55 ورھے پہلاں ایس پارٹی دا جھنڈا اُچا کیتا، بھٹو نے جَد پارٹی سنبھالی تے ملک 2 حصیاںوچ ونڈھیا ہویا سی ، اک ہارے ہوئے ملک نوں بھٹو نے اُمید دلائی،90ہزار فوجی ساڈے دشمن دی قید وچ سن، شہید بھٹو کامیاب خارجہ پالیسی نال90ہزار قیدی واپس لے کے آئے، جنگ ہارن توں بعد پاکستان دی5ہزار مربع زمین دشمن دے قبضے وچ سی،شہید بھٹو نے بغیر گولی چلائیاں5ہزار مربع زمین واپس لئی سی۔