صدر، وزیر اعظم نال آرمی چیف جنرل عاصم منیر تے جنرل ساحر شمشاد دی ملاقات

اسلام آباد( پنجابی میڈیا)پاک فوج دے نویں آرمی چیف جنرل عاصم منیر تے چیئرمین جوائنٹ چیفس آف سٹاف کمیٹی جنرل ساحر شمشاد نے صدر عارف علوی تے وزیر اعظم شہباز شریف نال ملاقات کیتی ۔ایوان صدر وچ نویں آرمی چیف جنرل عاصم منیر تے چیئرمین جوائنٹ چیفس آف سٹاف کمیٹی جنرل ساحر شمشاد دی عہدے سنبھالن توں بعد صدر مملکت ڈاکٹر عارف علوی نال پہلی ملاقات اے۔ ملاقات وچ ملکی سلامتی تے ہور معاملیاں اُتے گل بات کیتی گئی۔ایس توں بعد نویں فوجی قیادت ایوان وزیر اعظم پہنچی جیتھے اوہناں نے وزیر اعظم شہباز شریف نال وی ملاقات کیتی۔ وزیر اعظم نے آرمی چیف جنرل عاصم منیر نوں عہدہ سنبھالن اُتے مبارکباد دتی ۔ ملاقات وچ ملکی صورتحال دے امور اُتے تبادلہ خیال کیتا گیا۔پچھلے دناں وزیراعظم دا آرمی چیف جنرل عاصم منیر دے نال ٹیلی فون اُتے رابطہ ہویا سی جس وچ شہبازشریف نے نویں آرمی چیف لئی نیک تمناواں دا اظہار کیتا سی ،وزیراعظم دا کہنا سی کہ بہادر پاکستان آرمی دے سپہ سالار دا منصب سنبھالنا وڈا اعزاز اے۔