عمران نے رویے وچ تبدیلی کیتی، اسمبلیاں توڑن دی مذمت کراں گے:رانا ثناء اللہ

اسلام آباد(پنجابی میڈیا گروپ) وزیر داخلہ رانا ثناء اللہ نے آکھیا اے کہ ساڈا موقف اے کہ الیکشن ویلے اُتے ہون گے، خان صاحب تے کہندے سَن کہ اینہاں دے نال بیٹھن توں بہتر اے کہ میں مر جاواں، اللہ اوہناں نوں زندگی دیوے ۔پاکستان تحریک انصاف دے چیئرمین عمران خان دے خطاب اُتے رد عمل دیندیاں ہویاں رانا ثناء اللہ نے آکھیا کہ اسیں اسمبلیاں توڑن دے عمل نوں ویلکم نہیں کردے، غیر جمہوری سمجھدے ہاں، اگر ایہ اسمبلیاں توڑنا چاہندے نیں تے توڑ دین، ذمے داری اوہناں دی اے۔وزیر داخلہ نے آکھیا کہ سیاسی جماعتاں تے لوگ بیٹھدے نیں تے ڈیڈ لاک ختم ہُندے نیں تے رَستے نکلدے نیں ،پی ڈی ایم دا موقف رہیا اے کہ گل بات نہ کرن دیاں گلاں غیر سیاسی تے غیر جمہوری نیں، پی ڈی ایم دی قیادت گل بات کرن تے بیٹھن توں انکاری نہیں ہوئے گی۔