مل بیٹھ کے الیکشن دی تریخ دتی جائے، عمران دی حکومت نوں مذاکرات دی پیشکش

لہور( پنجابی میڈیا گروپ)پاکستان تحریک انصاف(پی ٹی آئی) دے چیئرمین تے سابق وزیراعظم عمران خان نے حکومت نوں مذاکرات دی پیشکش کردیاں ہویاں آکھیا کہ ساڈے نال مل بیٹھ کے عام الیکشن دی تریخ دتی جائے ورنہ اسمبلیاں توڑ دیاں گے، سیاسی استحکام لئی فوری الیکشن ول جانا ہوئے گا، اسیں بوہت کوشش کیتی مگر ایہ الیکشن دا نام نہیں لیندے ۔پارلیمانی پارٹی دے اجلاس نال خطاب کردیاں ہویاں عمران خان دا کہنا سی کہ پاکستان ڈیفالٹ ول جارہیا اے، موجودہ حکومت کول کوئی روڈ میپ نہیں، اسحاق ڈار نے آکھیا سی آکے موڈیز نوں ٹھیک کر دیاںگا، ہُن اسحاق ڈار چپ کر کے بیٹھ گیا اے، ساڈے دور وچ ٹیکسٹائل انڈسٹریاں نوں مزدور نہیں مل رہے سن، ساڈے دور وچ6 فیصد معیشت گروتھ کر رہی سی، ملک وچ بے روزگاری وی وَدھدی جارہی اے۔اوہناں نے ہور آکھیا کہ ساڈے دور وچ کساناں نوں پہلی وار فائدہ ہویا، ڈیزل دی قیمت وَدھن نال اج کسان رو رہیا اے، ساڈے دور وچ عالمی سطح اُتے پٹرول دیں قیمت مہنگی سی آج سستی اے، اج ملک وچ 50 سالہ مہنگائی دا ریکارڈ ٹٹ گیا اے، اج ملک وچ اسٹریٹ کرائم وی وَدھ رہے نیں، ساہنوں تے کوئی نقصان نہیں گالیاں تے حکومت نوں پہ رہیاں نیں، ملک تھلے جارہیا اے۔