الحمرا:رقص درویش وچ ترک آرٹسٹاں دی یادگار پرفارمنس

لہور(راجہ ناصر توں)الحمرا وچ رقص درویش اندر ترک آرٹسٹاں یادگار دی روح پرور پرفارمنس،قونصلیٹ جنرل آف ترکیہ دے پر بند ہیٹھ الحمرا دے تعاون نال پاکستان تے ترکیہ دوستی دے75وَرھے مکمل ہون اُتے رقص درویش صوفی نائٹ ود سیما پرفارمنس دا انعقاد کیا گیا جس وچ صوبائی وزیر صحت ڈاکٹر یاسمین راشد تے ترکیہ دے سفیر ڈاکٹر مہمت پاچاجی اُچیچے پروہنے سَن ۔ تقریب داآغاز تلاوت قرآن پاک تے دوناں برادرز ملکاں دے قومی ترانیاں توںہویا۔ترکیہ دے سفیر ڈاکٹر مہمت پاچاجی نے تقریب نال اپنے خیالات دا اظہار کردیاں ہویاں آکھیا کہ دوناں ملکاں دے درمیان مثالی تعلقات نیں جیہڑے مستقبل وچ ہور مضبوط ہون گے۔صوبائی وزیر صحت ڈاکٹر یاسمین راشد نے دوطرفہ تعلقات دی خوشگوار یاداں نوں حاضرین دے نال شیئر کردیاں آکھیا کہ ترکیہ نے ہر مشکل گھڑی وچ پاکستان دا بھرپور ساتھ دتا اے۔ایگزیکٹوڈائریکٹر الحمرا ذوالفقار علی زلفی نے اپنے تاثرات وچ الحمرا نوں پاک ترکیہ دوستی دے75وَرھے مکمل ہون اُتے یادگار تقریب دی میزبانی کرن اُتے فخر دا اظہار کیتا ۔ ترک آرٹسٹاں دی پرفارمنس ویکھن والیاں نوں مدتاں یاد رہے گی۔ تقریب وچ ڈپٹی قونصلر جنرل چین کاکی، ترکیہ دے قونصلر ایمر اوزبے،یونس ایمری کلچرل سنٹر دے اعلی عہدیداران،ڈائریکٹر جنرل خانہ فرہنگ ایران جعفر روناس،ممبر بورڈ آف گورنز لہور آرٹس کونسل الحمرا محمد علی بلوچ تے ہور اعلی سماجی، ثقافتی،سفارتی تے ہورااں شعبیاںنال تعلق رکھن والیاں شخصیتاں رِلت کر کے تقریب دی رونق ودھائی۔رقص درویش وچ آرٹسٹاں نے اپنے منفرد،معیاری تے اعلٰی انداز وچ رقص پیش کیتا ، ایہ رقص خاص اہمیت دا حامل سی۔ تقریب دی اہم گل حاضرین محفل دی ترک آرٹسٹاں دی پرفارمنس وچ دلچسپی قابل دید سی جیہڑی تقریب دے اختتام اُتے وی ہور پُرفارم ویکھن دے متمنی نظر آئے۔