باجوہ نے عمران خان دا ساتھ دین لئی مشورہ دتا، پرویز الٰہی

لہور(پنجابی میڈیا گروپ)وزیراعلی پنجاب چودھری پرویز الٰہی ہوراں آکھیا اے کہ سابق آرمی چیف جنرل باجوہ نے عمران خان دا ساتھ دین دا مشورہ دتا، باجوہ صاحب نے آکھیا تہاڈے لئی عمران خان والا رستہ بہتر اے، پی ٹی آئی چیئرمین دے کہن اُتے پنجاب اسمبلی توڑن نوں تیار ہاں پر مارچ تک انتظار کرن دا مشورہ دتا اے۔نجی ٹی وی چینل نوں دتے گئے انٹرویو وچ چودھری پرویز الٰہی ہاروں آکھیا سی کہ ن لیگ ول جاندیاں جاندیاں اللہ نے رستہ تبدیل کیتا تے رستہ وکھان لئی اللہ نے جنرل (ر)باجوہ نوں گھل دِتا، باجوہ صاحب نوں آکھیا کہ شریفاں دا اعتبار نہیں ۔وزیراعلی پنجاب نے ہور آکھیا کہ سابق آرمی چیف نوں آکھیا سی کہ شریفاں نے تہاڈے نال وی اوہو ای کیتا ، باجوہ صاحب نے آکھیا میرے نال جوہویا اوہ چھڈو ، باجوہ صاحب نے آکھیا اپنی گل تسی آپئی سوچو ، پر سوچ کے چلو ۔اوہناں دا کہنا سی کہ اسمبلی توڑن وچ اک منٹ نہیں لاواں گا ، ساڈا آئندہ سیاسی سفر عمران خان دے نال ہوویگا ۔اک ہور انٹرویو وچ چودھری پرویز الٰہی نے آکھیا کہ عمران خان دے کہن اُتے پنجاب اسمبلی توڑن نوں تیار ہاں پر مارچ تک انتظار کرن دا مشورہ دتا ، نہ جنرل (ر) باجوہ نے ڈبل گیم کیتی تے نہ عمران خان نے اینج کیتا۔