سائفر آڈیو لیک:عمران خان نے ایف آئی اے وچ طلبی لہور ہائیکورٹ وچ چیلنج کر دتی

لہور( پنجابی میڈیا گروپ)چیئرمین پاکستان تحریک انصاف تے سابق وزیراعظم عمران خان نے سائفر آڈیو لیک دے معاملے اُتے عدالت نال رجوع کر لیا۔سابق وزیراعظم عمران خان نے سائفر آڈیو لیک دے معاملے اُتے طلب کیتے جان نوں لہور ہائیکورٹ وچ چیلنج کر دتا اے، درخواست وچ وفاقی حکومت ،ایف آئی اے تے تفتیشی افسر نوں فریق بنایا گیا اے ۔ وکیل دے توسط نال دائر درخواست وچ موقف اپنایا گیا اے کہ عمران خان ایماندار، باعزت شہری، ملک دی نامور شخصیت نیں، اوہناں دا ملکی سیاست نوں نویں دھارے وچ لیان لئی اہم کردار اے، عمران خان دی وَدھ ہُندی شہرت سیاسی طاقتاں دے خلاف خطرہ بن چکی اے ۔درخواست وچ ہور آکھیا گیا اے کہ ایف آئی اے نے سائفر میسج دے معاملے اُتے انکوائری شروع کر رکھی اے تے ایس معاملے اُتے بیان قلمبند کروان لئی6دسمبر نوں طلب کیتا اے۔