بابری مسجد نوں اوس دی اصل جگہ اُتے دوبارہ تعمیر کیتا جائے : پاکستان

اسلام آباد( پنجابی میڈیاگروپ) بھارت وچ تریخی بابری مسجد دے انہدام دی30ویں برسی دے موقع اُتے ترجمان دفتر خارجہ دا کہنا اے کہ ایہ واقعہ ہندوستان وچ وَدھ ہندے مسلم مخالف جنون دی اک افسوسناک یاد دہانی اے۔ ترجمان دفتر خارجہ دا کہنا سی کہ اسیں مسمار کیتی گئی مسجد دی جگہ اُتے ہندو مندر دی جاری تعمیر تے ذمہ دار مجرماں دی بریت دی مذمت کردے ہاں ۔ بھارت وچ مسلماناں دی مذہبی آزادیاں اُتے مسلسل حملہ ہورہیا اے، بھارتی حکومت نال مطالبہ کردیاں ہاں کہ بابری مسجد نوں اوس دی اصل جگہ اُتے دوبارہ تعمیر کیتا جائے۔اوہناں نے آکھیا کہ بین الااقوامی برادری نوں بھارت وچ وَدھ ہندے اسلاموفوبیا تے نفرت انگیز جرماں دا نوٹس لینا چاہیدا اے، بھارتی حکومت نوں اقلیتاں بالخصوص مسلماناں تے اوہناں دی عبادت گاہوں دے تحفظ نوں یقینی بنانا چاہیدا اے۔