ارشد شریف قتل کیس: سپریم کورٹ دا ایس جے آئی ٹی بنان دا حکم

اسلام آباد( پنجابی میڈیا گروپ)سپریم کورٹ نے ارشد شریف قتل دی تحقیقات بارے ازخود نوٹس کیس وچ پُلس دی جے آئی ٹی مسترد کردیاں ہویاں نویں سپیشل جوائنٹ انویسٹی گیشن ٹیم تشکیل دین دا حکم دے دتا ۔ سپریم کورٹ وچ ارشد شریف قتل دی تحقیقات بارے ازخود نوٹس کیس دی سماعت ہوئی، چیف جسٹس عمر عطا بندیال دی سربراہی وچ5رُکنی بنچ نے سماعت کیتی ، ارشد شریف دی والدہ، سیکرٹری داخلہ و اطلاعات، ڈی جی ایف آئی اے عدالت وچ پیش ہوئے، ایڈیشل اٹارنی جنرل عامر رحمان، آئی جی اسلام آباد وی عدالت وچ پیش ہوئے۔ وزارت داخلہ ولوں فیکٹ فائنڈنگ رپورٹ عدالت وچ پیش کیتی گئی، ایس دے علاوہ تھانہ رمنا وچ درج قتل دی ایف آئی آر دی کاپی وی عدالت وچ پیش کیتی گئی ۔ چیف جسٹس پاکستان نے آکھیا کہ ارشد شریف دی والدہ دا موقف وی سُناں گے، صحافی نے شکایت کیتی کہ پُلس نے ارشد شریف دے اہلخانہ نال درست رویہ نہیں اپنایا ۔ چیف جسٹس پاکستان نے آکھیا کہ وہیل چیئر لئی لفٹ تبدیل کر رہے ہاں ، ایس اُتے معذرت خواہ ہاں، پُلس والا معاملہ وی ویکھ لاں گے۔ ایڈیشنل اٹارنی جنرل عامر رحمان نے فیکٹ فائنڈنگ رپورٹ پڑھ کے سُنائی، ایڈیشنل اٹارنی جنرل نے آکھیا کہ کینیا وچ ہائی کمیشن متعلقہ حکام دے نال رابطے وچ اے، ارشد شریف دے قتل دا مقدمہ درج کر لیا گیا اے۔