پی ٹی آئی اجلاس: اسمبلیاں توں استعفیاں لئی مشورے

لہور( پنجابی میڈیا گروپ)موجودہ سیاسی صورتحال تے اسمبلیاں دی تحلیل دے معاملے اُتے پاکستان تحریک انصاف(پی ٹی آئی) دی سینئر قیادت دا اجلاس شروع ہوگیا جس وچ اسمبلیاں توں استعفے تے تحلیل دے حوالے نال مشورے ہون گے ۔ ذرائع دے مطابق مشاورتی اجلاس وچ ملکی سیاسی صورتحال تے عام الیکشن دیاں تیاریاں دا جائزہ لیا جائے گا ،اجلاس وچ حقیقی آزادی مارچ دی کامیابی توں بعد ’’الیکشن کرائوملک بچائو‘‘ تحریک دے حوالے نال تفصیلی مشاورت ہوئے گی، ’’الیکشن کرائو ملک بچائو‘‘ تحریک دے دائرہ کار وسیع کرن اُتے وی تبادلہ خیال ہوئے گا ۔ایس حوالے نال ذرائع ولوں ہور دسیا گیا کہ اجلاس وچ پی ٹی آئی دے وائس چیئرمین شاہ محمود قریشی، فواد چودھری،عمران اسماعیل، تیمور جھگڑا، شفقت محمود، سپیکر پنجاب اسمبلی سبطین خان، اپوزیشن لیڈر سینیٹ شہزاد وسیم، بابر اعوان، شیریں مزاری، سیف اللہ نیازی،عامر کیانی، فرخ حبیب، ڈاکٹر نوشین حامد، عثمان بزدار، میاں محمود الرشید، میاں اسلم اقبال، ڈاکٹر ارسلان، بیرسٹر علی ظفر سنے ہور وی موجود نیں ۔مشاورتی اجلاس توں بعد پی ٹی آئی دے رہنما فواد چودھری تے مسرت جمشید چیمہ میڈیا نوں اجلاس بارے آگاہ کرن۔