نیب نے آصف زرداری تے نوازشریف دے خلاف اک ہور ریفرنس دائر کر دتا

اسلام آباد: نیب نے آصف زرداری ، نوازشریف تے یوسف رضا گیلانی دے خلاف اک ہور ریفرنس دائر کر دتا اے۔ نیب نے چیئرمین جسٹس (ر) جاوید اقبال دے دستخط دے بعد آصف زرداری، نوازریف تے یوسف رضا گیلانی دے خلاف توشہ خانہ ریفرنس دائر کردتا۔

ریفرنس وچ موقف اختیار کیتا گیا اے آصف زرداری تے نوازشریف نے یوسف رضا گیلانی توں غیر قنونی طور تے گڈیاں حاصل کیتیاں۔ ملزمان نیب آرڈیننس دی سیکشن نائن اے دی ذیلی دفعہ 7,4,2تے 12دے تحت کرپشن دے مرتکب ہوئے نیں، ملزمان دا قنون دے مطابق ٹرائل کرکے سخت سزا سنائی جاوے۔

ریفرنس وچ آصف زرداری تے الزام لاگو کیتا گیا اے آصف زرداری نوں بطور صدر لیبیا تے یو اے ای توں گڈیاں تحفے وچ ملیاں، آصف زرداری نے گڈیاں توشتہ خانہ وچ جمع کران دے بجائے آپ استعمال کیتیاں، اوہناں نے گڈیاں دی صرف 15فیصد ادائیگی انور مجید تے عبدالغنی مجید دے راہیں ادا کیتی۔

انور مجید نے انصاری شوگر ملز دے اکاؤنٹس دا استعمال کرکے 2کروڑ توں ودھ دی غیر قنونی ٹرانزیکشنز کیتیاں، ملزم نے آصف زرداری دے اکاؤنٹس وچ وی 9.2ملین روپے ٹرانسفر کیتے، عبدالغنی مجید نے 37ملین روپے کسٹم کلیکٹر اسلام آباد نوں ٹرانسفر کیتے۔

نیب نے ریفرنس وچ نوازشریف تے الزام لاگو کیتا اے نوازشریف 2008وچ کسے وی عہدے تے نہیں سن، اوہناں نوں 2008وچ بغیر کوئی درخواست دتے توشہ خانے توں گڈی دتی گئی۔