احتساب عدالت نے آصف زرداری دا گھر منجمد کرن دی منظوری دے دتی

لہور: احتساب عدالت نے سابق صدر آصف زرداری دا گھر منجمد کرن دی منظوری دے دتی۔ نیب نے سابق صدر دے کلفٹن والے گھر نوں 12فروری 2020نوں منجمد کیتا سی۔ دسیا گیا اے نیب نے آصف زرداری دے کلفٹن والے مکان نوں منجمد کرن دی کنفرمیشن دی درخواست دائر کیتی سی جہدے تے تفتیشی افسر احمد سعید وزیر عدالت وچ پیش ہوئے۔

نیب پراسیکیوٹر دے مطابق گھر دی خریداری لئی پیسے جوائنٹ اکاؤنٹ دے راہیں دتے گئے، مکان اپریل 2014وچ خریدیا گیا سی۔ نیب پراسیکیوٹر نے عدالت دے ساہمنے موقف اختیار کیتا کہ مکان کرپشن دے پیسیاں نال خریدیا گیا۔

عدالت نے نیب دی استدعا منظور کردیاں سابق صدر دے گھر نوں منجمد کرن دی توثیق کر دتی تے گھر منجمد کرن دے آرڈر دی کاپی ملزم نوں فراہم کرن دی ہدایت وی کیتی۔