گورنردی ایڈوائس غیر قنونی، سپیکر پنجاب اسمبلی نے رولنگ دے دتی

لہور( پنجابی میڈیا گروپ)سپیکر پنجاب اسمبلی سبطین خان نے گورنر دے طلب کردہ اجلاس نوں غیر قنونی قرار دیندیاں رولنگ جاری کردتی ۔ سپیکر نے 2 صفحیاں اُتے مشتمل رولنگ دیدیاں ہویاں آکھیا کہ رواں اجلاس سپیکر نے بلایا تے اوہی ایس نوں ختم کرسکدا اے جد تک سپیکر اپنے بلائے اجلاس نوں ختم نہ کرے گورنر نوا اجلاس نہیں بلاسکدا۔رولنگ وچ لہور ہائیکورٹ دے 3 رکنی بینچ دے فیصلے دا حوالہ دیندیاں ہویاں آکھیا گیا اے کہ عدم اعتماد دی تحریک اُتے ووٹنگ لئی نوا اجلاس بلانا ضروری اے، عدم اعتماد دی تحریک اُتے ووٹنگ لئی نوا اجلاس بلان توں پہلاں رواں اجلاس دا ختم ہونا ضروری اے ۔ رولنگ وچ ہور آکھیا گیا اے کہ پنجاب اسمبلی پہلاں توں ہی سپیکر دے طلب کردہ اجلاس تحت جاری اے، موجودہ اجلاس غیر معینہ مدت لئی ملتوی ہون اُتے ہی گورنر نوا اجلاس سدھ سکدا اے، وزیراعلی پنجاب نوںآئین دے آرٹیکل 130-7 تحت اعتماد دے ووٹ لئی اوسی ویلے آکھیا جا سکدا اے جد اجلاس خصوصی طور اُتے ایسی مقصد لئی طلب کیتا ہوئے ۔ رولنگ وچ وزیر اعلی منظور وٹو دا حوالہ دیندیاں ہویاں اکھیا گیا عدم اعتماد دی تحریک اُتے ووٹنگ توں پہلاں کم از کم 10 دن وزیر اعلی نوںدینا لازم اے، گورنرولوں ایوان اقبال وچ بلایا گیا،41 واں اجلاس وی اجے تک ختم نہیں کیتا گیا، پنجاب اسمبلی رولز آف پروسیجر دے رول 209 اے دے تحت گورنر دا بلایا گیا نوا اجلاس غیر قنونی اے۔