کرونا وائرس دے سدباب لئی شہباز شریف دی خدمات لئی جان، قرارداد پنجاب اسمبلی وچ جمع

لہور: کرونا وائرس دے خاتمے لئی اپوزیشن لیڈر شہباز شریف دی خدمات حاصل کرن دے مطالبے دی قرارداد پنجاب اسمبلی وچ جمع کرا دتی گئی اے۔ قرارداد مسلم لیگ (ن) دی رکن پنجاب اسمبلی راحت افزا ولوں جمع کرائی گئی اے۔قرارداد دے متن وچ آکھیا گیا اے پاکستان وچ کرونا وائرس دے تصدیق شدہ کیساں دی تعداد 4ہو گئی اے۔

عالمی ادارہ صحت دے مطابق ایہ وباء تیزی نال پھیل رہی اے۔ فوری ایکشن ای ایس بیماری نوں پھیلن توں روک سکدا اے۔ قرارداد دے متن وچ الزام لاگو کیتا گیا اے حکومت پنجاب کرونا وائرس تے عملی اقدامات دی بجائے نمائشی انتظامات کر رہی اے، جہدے نال عوام وچ عدم تحفظ دا احساس ودھ رہیا اے۔

حکومت توں قرارداد وچ مطالبہ کیتا گیا اے اوہ شہباز شریف دے ماڈل تے صوبے بھر وچ اقدامات کرے جیویں سابق وزیراعلیٰ نے ڈینگی دے انسداد لئی کم کیتا سی۔ متن وچ آکھیا گیا اے پنجاب دے عوام مشکل دی ایس گھڑی وچ شہباز شریف ول ویکھ رہے نیں۔

ایس لئی ایہ ایوان حکومت توں مطالبہ کردا اے اوہ کرونا وائرس دے خاتمے لئی شہباز شریف دی خدمات حاصل کرے تاں جے عوام وچ پایا جان والا خوف دور ہو سکے۔