پنجاب اسمبلی اندر پلس گھسنا چنگی گل نہیں،وزیراعلیٰ چودھری پرویز الٰہی

لہور ( پنجابی میڈیاگروپ) وزیراعلیٰ پنجاب چودھری پرویز الٰہی نے آکھیا اے کہ ملکی تریخ وچ پہلی وار پلس اسمبلی دے اندر تک گھس آئی، جو ہویا اوہ اک بدنما داغ اے، اسمبلی دے اندر ہمیشہ بھائی چارے دی فضا برقرار رکھن دی کوشش کیتی، اجے تک پلس اصلاحات لئی بوہت کم کیتا اے۔ایہ گلاں اوہناں نے پچھلے دناں پنجاب اسمبلی دی نویں عمارت دے باقاعدہ افتتاح دے موقع تقریب نال خطاب کردیاں ہویاں کیتیاں ۔وزیراعلی پرویز الٰہی نے نویں عمارت دے افتتاح توں بعد دعا وی کیتی۔عمارت دے افتتاح دے موقع اُتے سپیکر پنجاب اسمبلی محمد سبطین خان، سینئر صوبائی وزیر میاں اسلم اقبال، صوبائی وزراء میاں محمودالرشید، راجہ بشارت، سردار حسنین بہادر دریشک، سردار آصف نکئی، سردار شہاب الدین، چیف سیکرٹری پنجاب عبداللہ سنبل، پرنسپل سیکرٹری وزیراعلیٰ محمد خان بھٹی، انسپکٹر جنرل پلس پنجاب عامر ذوالفقار، سابق پرنسپل سیکرٹری جی ایم سکندر، سیکرٹری پنجاب اسمبلی عنایت اللہ لک، ڈی جی پروٹوکول پنجاب عنصرنذیر تے اعلی حکام وی موجود سن۔