بجلی دی بچت: مارکیٹاں ساڑھے 8، شادی ہال 10 وجے بند کرن دااعلان

اسلام آباد (پنجابی میڈیا گروپ)وفاقی کابینہ نے توانائی پالیسی دی منظوری دے دتی جس دے تحت وفاقی اداریاں وچ بجلی دے استعمال وچ 30 فیصد کمی لیائی جائے گی جدکہ وزیر دفاع خواجہ آصف نے ملک بھر وچ بجلی دے استعمال وچ کمی لیان لئی مارکیٹاں ساڑھے 8 وجے تے شادی ہال 10 وجے بند کرن دااعلان کردیاں ہویاں آکھیا اے کہ کابینہ دے اجلاس وچ کوئی لائٹ آن نہیں سی، اقدام دا مقصد بجلی دی بچت سی، وزیر اعظم نے ہدایت کیتی اے سارے وفاقی سرکاری اداریاں وچ بجلی دے استعمال وچ 30 فیصد کمی لیائی تے برقی آلات دے غیر ضروری استعمال توں اجتناب کیتا جائے،غیر موثر پنکھے، بلب فیکٹریاں وچ بننے بند ہوجان گے،ملک بھر وچ ای بائیکس متعارف کرائی جارہی اے،توانائی بچت پلان دے نکات مطابق مارکیٹاں، ریسٹورنٹس تے شادی ہالاں دی چھیتی بندش نال قومی خزانے نوں62 ارب روپے دی بچت ہوئے گی، صدر مملکت توانائی بچت منصوبہ اُتے خیبرپختونخوا تے پنجاب دے حوالے نال اپناکردار ادا کرن، منصوبہ فوری طور اُتے نافذ کیتا جائے گا تے کابینہ اوس دی نگرانی کرے گی، بجلی بچت لئی قومی سطح اُتے آگاہی مہم چلائی جائے گی، نجی تے سرکاری ٹیلی ویژن، ریڈیو چینلاں ذریعے بھرپور مہم چلائی جائے گی، اوس دے علاوہ پانی دی بچت دے حوالے نال وی اقدام کیتے جان گے، پانی دیاں قیمتاں اُتے نظر ثانی کیتی جائے گی، پانی دی بچت دے حوالے نال بلڈنگ بائی لاز وچ ضروری اصلاح کیتی جائے گی۔ منگل نوں وفاقی کابینہ دے اجلاس توں بعد وفاقی وزیراں مریم اور نگزیب ، خرم دستگیر خان ، شیری رحمن ، مولانا عبد الواسع دے ہمراہ کابینہ اجلاس وچ کیتے گئے فیصلیاں بارے میڈیا نوں آگاہ کردیاں ہویاں خواجہ آصف نے دسیا کہ ہون والے کابینہ اجلاس وچ توانائی پالیسی دی منظوری دتی گئی اے، پالیسی تحت وفاقی اداریاں وچ بجلی دے استعمال وچ30 فیصد کمی لیائی جائے گی۔