سرکار نے نوازشریف دی حوالگی لئی برطانیہ نوں خط لکھ دتا

اسلام آاد: وفاقی حکومت نے مسلم لیگ (ن) دے قائد نوازشریف دی وطن واپسی لئی برطانوی حکومت نوں خط لکھ دتا۔ وزیر خارجہ شاہ محمود قریشی نے نوازشریف دے حوالے نال برطانوی حکومت نوں لکھے گئے خط دی تصدیق کر دتی۔

خط وچ آکھیا گیا نوازشریف پاکستان وچ سزا یافتہ مجرم نیں، اوہناں نوں علاج لئی لندن گھلیا گیا سی پر اوہ نہ کسے ہسپتال وچ داخل ہوئے تے نہ ای علاج کروایا، ایس لئی برطانیہ اوہناں نوں واپس پاکستان بھجوائے تاں جے اوہ اپنی سزا مکمل کر سکن۔

دوجے پاسے مسلم لیگ (ن) دے صدر شہباز شریف نے برطانوی حکومت نوں خط لکھن دے حکومتی اقدام دی شدید مذمت کردیاں ایہنوں مکمل طور تے غیر اخلاقی تے غیر منطقی اقدام قرار دتا۔

شہباز شریف نے آکھیا حکومت نوں خط لکھن دا کوئی قنونی اختیار نہیں، حکومتی جلد بازی مجرمانہ تے مذموم ارادیاں نوں عیاں کردی اے، نوازشریف نوں اسلام آباد ہائی کورٹ نے 8ہفتے دی ضمانت دتی سی جہدے وچ توسیع لئی سرکار نال رجوع کرن دا آکھیا سی جہنے توسیع دی درخواست رد کردتی، پر عدالتی حکم سی کہ حکومت دے کسے اقدام تے دوبارہ عدالت نال رجوع کر سکدے نیں، ایس لئی اسیں عدالت نال رجوع رجوع دا حق استعمال کراں گے۔