حکومتی اقدامات دے نتیجے وچ مہنگائی دی شرح گھٹ ہو رہی اے: حماد اظہر

اسلام آباد: وفاقی وزیر برائے اقتصادی امور حماد اظہر آکھیا اے حکومتی اقدامات دے نتیجہ وچ مہنگائی دی شرح وچ کمی تے برآمدات وچ وادھا ہو رہیا اے۔ ٹوئٹر تے جاری کیتے اپنے پیغام وچ اوہناں نے آکھیا حکومت نے معیشت دی بہتری تے افراط زر دی شرح تے قابو پان لئی جہڑے اقدامات کیتے ایہناں دے نتائج ساہمنے آ رہے نیں۔ فروری وچ اشیائے ضروریہ دی قیمتاں وچ نمایاں کمی آئی اے۔

وفاقی وزیر دے ٹوئٹ دے مطابق جنوری دے مقابلے وچ فروری وچ پیاز دی قیمت وچ 8.8فیصد، ٹماٹر، 60.3 فیصد، آلو 12.9فیصد، تازہ سبزیاں 11.5فیصد تے آٹے دی قیمتاں وچ 5.3فیصد دی نمایاں کمی آئی اے۔ غیر غذائی اشیاء وچ ایل پی جی تے بجلی دی قیمت 13.5فیصد گھٹ ہوئی۔ اوہناں آکھیا عام بندے لئی قیمتاں دا حساس اشاریہ 14.6فیصد توں ڈگ کے 12.4فیصد ہو گیا اے۔وفاقی وزیر دا کہنا سی فروری دے مہینے وچ برآمدات وچ 13.6فیصد وادھا جد کہ درآمدات وچ 4فیصد دی کمی ریکارڈ کیتی گئی۔

ایہ خوش آئند امر اے پاکستان دی برآمدات وچ اک اجہے موقع تے وادھا ہو رہیا اے جدوں خطے دے دوجے ملکاں وچ برآمدات دی شرح وچ کمی ویکھن وچ آ رہی اے۔