’’الیکشن کرائو ملک بچائو‘‘ مہم ہور تیز کیتی جائے: عمران خان دی پارٹی نوں ہدایت

لہور( پنجابی میڈیاگروپ)حکومت ولوں ارکان قومی اسمبلی دے استعفیاں دی منظوری دا جواب دین لئی چیئرمین پاکستان تحریک انصاف عمران خان نے حکمت عملی تیار کرلئی۔سابق وزیر اعظم عمران خان نے قومی اسمبلی دے استعفیاں دی منظوری توں بعد انتخابی مہم نوں تیز کرن دا فیصلہ کردیاں آکھیا اے کہ ڈاکٹراں توں اجازت ملن دے بعد خود حکومت نوں ٹف ٹائم دین لئی میدان وچ اتراں گا،چیئرمین پی ٹی آئی نے جلسیاں دا شیڈول تیار کرن دی ہدایت کردتی ۔ ذرائع مطابق انتخابی مہم وچ رجیم چینج دے نال مہنگائی نوں ایشو بنایا جائے گا، ملک نوں بدترین معاشی مشکلاں توں کَڈن لئی پی ٹی آئی دے چیئرمین قوم نوں روڈ میپ وی دین گے، اکنامک ٹیم نوں معاشی بحران توں کَڈن لئی تجویزاں تیار کرن، سوشل میڈیا ٹیم نوں حکومت دیاں نکام معاشی پالیسیاں تے مہنگائی نوں ایشو بنان دی ہدایت کر دتی گئی۔ عمران خان نے سپیکر قومی اسمبلی ولوں70ارکاناں دے استعفے منظور کیتے جان توں بعد اسد قیصر دی قیادت وچ ہوراں رہنماواں نوں باقی استعفیاں دی منظوری لئی وی ٹاسک دے دتا، الیکشن توں پہلاں تحریک انصاف دا پیغام گھر گھر پہنچنا چاہیدا اے، عمران خان نے پارٹی نوں ’’الیکشن کرائو ملک بچائو‘‘ تے ڈور ٹو ڈور مہم وچ ہور تیزی لیان دی ہدایت کر دتی۔

اپنا تبصرہ گھلو