نوجواناں نوں75لکھ تک قرضہ،1لکھ لیپ ٹاپ دیاں گے،شہباز شریف
اسلام آباد( پنجابی میڈیا گروپ)وزیر اعظم شہباز شریف نے آکھیا اے کہ ساڈے نوجوان باصلاحیت نیں، اگر وسائل فراہم کیتے جان تے ساڈے نوجوان ملک دی تقدیر بدل سکدے نیں، اسیں نوجواناں نوں5توں75لکھ روپے تک دے قرضے دیاں گے،ایس دے علاوہ نوجواناں لئی1لکھ لیپ ٹاپ پروگرام لیا رہے ہاں۔پرائم منسٹر یوتھ بزنس اینڈ ایگری لونز دی افتتاحی تقریب نال خطاب کردیاں وزیر اعظم نے آکھیا کہ نوجواناں نوں فراہم کیتا جان والا5لکھ تک دا قرضہ بلاسود ہوئے گا،5توں15لکھ تک7فیصد دی شرح دے حساب نال قرضے دتے جان گے۔ شہباز شریف دا کہنا سی کہ نوجواناں نوںاپنے پیراں اُتے کھڑا کرنا چاہیدے ہاں،ساڈے دور وچ نوجواناں نوں لیپ ٹاپ دتے گئے،لیپ ٹاپ دتے تے آکھیا گیا ایہ سیاسی رشوت اے،لیپ ٹاپ نہیں تے کیا ہتھاں وچ کلاشنکوف دیندا۔شہباز شریف دا کہنا سی کہ پنجاب دے اپنے وسائل نال نوجواناں نوں بلاسود قرضے فراہم کیتے سن،نوجواناں توں قرضیاں دی واپسی دی شرح99فیصد سی،کورونا دے دوران نوجواناں نے لیپ ٹاپ ذریعے باعزت روزگار کمایا،نوجواناں نوں وسائل دی فراہمی دے عمل نوں کجھ لوکاں نے تنقیددا نشانہ بنایا۔اوہناں نے آکھیا کہ پاکستان نوں بچانا اے تے اوس دی قیمت ادا کرنا ہوئے گی، سب جاندے نیں کہ انتہائی مشکل حالات وچ اسیں ایہ ذمہ داری سنبھالی، تیل دی امپورٹ اُتے27ارب ڈالر خرچ ہو گئے،کجھ اقدام کر کے اسیں کَجھ ارب ڈالر بچا سکدے ساں،ساڈی حکومت نے توانائی بچت پروگرام دا فیصلہ کیتا اے۔شہباز شریف نے آکھیا کہ 8وجے دکاناں بند کرن دا فیصلہ کیتا تے حکم امتناع لے لیا گیا،توانائی بچت پروگرام دے خلاف اک صوبے دی حکومت ہائیکورٹ چلی گئی تے اسٹے آرڈر لے لیا،ہائیکورٹ دااک حکم جاری ہویا جیہڑا سرآکھاں اُتے اے۔اوہناں نے آکھیا کہ پاکستان نوں بچانا اے تے سیاست دی قربانی دینا پئے گی،پاکستان نوں بچان لئی اپنی سیاسی کمائی قربان کر دیاں گا،اج اسیں بڑیاں مشکلاں وچ ہاں،پاکستان لئی جان دے دیاں گا،ہر قدم چُکاں گا،ملک نوں ایس صورتحال توں کَڈاں گے۔وزیر اعظم دا اپنے خطاب دے دوران کہنا سی کہ نوجوان ساڈے سراںدے تاج تے پاکستان دے ستارے نیں، لون پروگرام ہزارگنا وَدھ ہو سکداسی لیکن جنہی چادر اے اوہنے پیر پھیلاواں گے،نوجواناں لئی 1لکھ لیپ ٹاپ پروگرام لیا رہے ہاں۔شہباز شریف نے آکھیا کہ اسٹیٹ بینک اجے وی کہندا اے شرح سود نوں ودھانا اے، اینج نہیں ہو سکدا کہ سیاست، ریاست نوں اک نال بچائے، پاکستان نوں بچان دی جیہڑی ذمہ داری لئی اے اوہ آخری دم تک نبھاواں گا، سیاسی پوائنٹ سکورنگ لئی اک ہورصوبے نے تاخیری حربے اپنائے۔اوہناںنے آکھیا کہ مشکل ویلے وچ سب توں وڈی ذمہ داری حکومت وقت دی ہُندی اے، بوہت چھیتی اسیں پاکستان نوں طوفانی لہراں توں کَڈ لاں گے، اسیں اک اک پائی بچا کے تہاڈے قدماں وچ نچھاور کراں گے،اسیں اپنے اقداماں اُتے50فیصد وی عمل کر لئے تے قوم دی حالت بدل جائے گی۔شہباز شریف نے آکھیا کہ پاکستان دی خاطر امیر طبقے تے اشرافیہ نوں قربانیاں دیناہون گیاں،ماضی توں سبق سِکھو تے اگے وَدھو،ماضی وچ رہواں گے تے ہور نقصان ہوئے گا





















