فواد چوہدری دی گرفتاری قنونی طریقے نال ہوئی،مسلم لیگ(ن)

اسلام آباد(پنجابی میڈیا گروپ)پاکستان مسلم لیگ(ن) نے آکھیا اے کہ فواد چوہدری دی گرفتاری قنونی طریقے نال ہوئی،کس نے اجازت دتی جو منہ وچ آئے کہنا شروع کردیندے،عمران نیازی اپنی حکومت ڈیگن داخود ہی موجب بنیا،پاکستان نوں بچان لئی عمران خان حصے دیاں گالیاں تے نزلہ اپنے کندھیاں اُتے لیا،جیہڑے لوگ ریاست پاکستان نوں ذاتی مفاد دی بھینٹ چڑھان گے اوہناں دی جگہ جیل ہوئے گی،اگر اک وزیر اعظم نوں تنخواہ نہ لین اُتے گھر گھلیا گیا تے دُوجے نوں بیٹی چھپان اُتے گھر گھلنا ہوئے گا،دھونس تے دباو نال مرضی دے فیصلے لین دا رواج کِدھرے تے رُکے گا۔ایہہ گلاں اظہار وزیراعظم دے معاون خصوصی عطاء تارڑ تے پاکستان مسلم لیگ (ن) دے رہنما عابد شیر علی نے بدھ نوں ایتھے سانجھی پریس کانفرنس نال خطاب کردیاں ہویاں کیتیاں۔عابد شیر علی نے آکھیاکہ کجھ دناں توں ملک وچ عجیب کشمکش تے منظر اے، پچھلے حکمراناں پاکستان دی سالمیت تے معیشت نال کھیڈیا،عمران خان ساڑھے3ورھے پاکستان دی اقتصادی تباہی دا موجب بنیا،عمران نیازی اپنی حکومت ڈیگن دا خود ہی موجب بنیا،جادو ٹونے دا راج تے قنون شکنی کیتی تے جگ ہنسائی کیتی۔