سپریم کورٹ بار دی فواد چودھری دی گرفتاری اُتے مذمت

اسلام آباد( پنجابی میڈیاگروپ)سپریم کورٹ بار ایسوسی ایشن ولوں تحریک انصاف دے رہنما فواد چودھری دی غیر قنونی گرفتاری دی شدید مذمت کیتی گئی تے اوہناں دی فوری رہائی دا مطالبہ کیتا گیا۔سپریم کورٹ بارولوں جاری اعلامیہ وچ آکھیا گیا اے کہ سابق وفاقی وزیر فواد چودھری سپریم کورٹ بار ایسوسی ایشن دے رُکن نیں،سپریم کورٹ بار نوں اوہناں دی گرفتاری اُتے گہری تشویش اے، فواد چودھری نال بدسلوکی تے ہتھکڑیاں لانا توہین آمیز رویہ اے۔سپریم کورٹ بار نے ہور آکھیا کہ آئین پاکستان ہر فرد نوں شفاف ٹرائل تے حسن سلوک دی ضمانت دیندا اے،گرفتاری دی وجہ نامعقول اے جس دا کوئی قنونی جواز نہیں،سابق وفاقی وزیردی گرفتاری اختیاراں دے ناجائز استعمال تے سیاسی انتقام دی واضح مثال اے۔اعلامیہ وچ ہور آکھیا کہ سیاسی مخالفاں دی آوازدُبان دی روایت ختم ہونی چاہیدی اے،آرٹیکل19ہر شہری نوں آزادی اظہار دے یکساں موقع فراہم کردا اے،اگر کسی نے کوئی جرم کیتا اے تے اوس دے خلاف قنون دے مطابق کاروائی ہونی چاہیدی اے۔