مینوں مروان لئی پلان سی بن گیا اے:عمران خان

لہور(پنجابی میڈیا)پاکستان تحریک انصاف(پی ٹی آئی)دے چیئرمین تے سابق وزیراعظم عمران خان ہوراں آکھیا اے کہ مینوں رَستے توں ہٹان دی کوششں جاری اے جس دے تحت پلان سی بن گیا اے، آصف زرداری نے اَت گرد تنظیم نوں پیسہ دے دتا اے اوہناں نے ہُن اگلی واردات کرنی اے، زندگی تے موت اللہ دے ہتھ اے، جِداں ہی ٹھیک ہویا عوام وچ نکلاں گا ۔ ویڈیو لنک ذریعے خطاب وچ چیئرمین پی ٹی آئی عمران خان نے آکھیا کہ میرے قتل دی نویں سازش دے پیچھے آصف زرداری اے، پلان اے وچ4 لوکاں نے بند کمرے وچ میرے قتل دی سازش تیار کیتی، پلان بی دے مطابق مینوں مذہبی انتہا پسندی اُتے قتل کروانا سی ، پلان بی تے پلان اے وچ نکامی توں بعد پلان سی بنایا گیا اے، پلان سی وچ4لوکاں دے علاوہ آصف زرداری وی شامل اے، آصف زرداری نے سندھ حکومت دا پیسہ اک اَت گرد تنظیم نوں دتا اے، میرے خلاف سندھ حکومت دا لٹیا ہویا پیسہ استعمال کیتا جارہیا اے۔اوہناں نے آکھیا کہ جیہڑے4لوگ مینوں قتل کروانا چاہندے سن اوہناں دے نال آصف زرداری وی شامل اے، قوم نوں ایس لئی دَس رہیا ہاں کہ اگر مینوں کجھ ہویا تے تہانوں پتا ہوئے کہ اوہ لوگ کون نیں، اینہاں لوکاں دا مقصد اے کسی طرح عمران خان نوں رستے توں ہٹایا جائے، اینہاںنوں4لوکاں نوں بچان دی کوشش کیتی جا رہی اے، جمہوریت، اداریاں دی تباہی دا مقصد اوہناں دی چوری چھپانا تے مینوں رَستے توں ہٹانا اے، اوہناں نوں خوف اے کہ جنہاں نے سازش کیتی کِدھرے اوہناں دا پتا نہ چل جائے، ساری قوم عدلیہ وَل ویکھ رہی اے، ایہ فیصلہ کُن ویلا اے۔سابق وزیراعظم نے آکھیا کہ معاشی بدحالی رجیم چینج دا نتیجہ اے، پاکستان ڈیفالٹ دے نیڑے اپڑ گیا اے، امپورٹڈ حکمراناں نوں ریلیف دین لئی نہیں لیایا گیا، مہنگائی اُچی ترین سطح اُتے اپڑ گئی، بے روزگاری مسلسل وَدھ رہی اے، ڈالر دی قیمت وچ حالیہ وَدھا نال نوا طوفان آئے گا، گیس تے پٹرول سنے ہر شے دی قیمت وَدھ گئی اے، ہر کوئی بے نقاب ہوگیا اے۔