کوئٹہ توں کراچی آن والی کوچ نوں حادثہ،41جاں بحق

لسبیلہ(پنجابی میڈیاگروپ) بلوچستان دے ضلع لسبیلہ دے تحصیل بیلہ وچ کوئٹہ توں کراچی آن والی کوچ کھائی وچ ڈِگن نال41 مسافر جاں بحق ہو گئے ۔ریسکیو ذرائع دے مطابق کھائی وچ ڈِگن توں بعد مسافر کوچ وچ آگ لگ گئی جس اُتے قابو پان وچ2گھنٹے لگ گئے، بعد وچ لاشاں کَڈن دا عمل شروع کردتا گیا۔اسسٹنٹ کمشنر بیلہ حمزہ انجم نے دسیا کوئٹہ توں کراچی آن والی مسافر بس تیزرفتاری پاروں بیلہ دے نیڑے موڑ کٹدیاں ہویاں پُل دے ستون نال ٹکرا کے کھائی وچ جاڈِگی جس پاروں ایس وچ اگ لگ گئی۔حمزہ انجم نے دسیا کوچ وچ48افراد سوارسن جنہاں وچوں اک بال تے خاتون سنے3زخمیاں نوں زندہ کَڈ لیا گیا جدکہ ہُن تک40لاشاں کَڈیاں جا چُکیاں نیں ۔اوہناں نے دسیا کہ زخمیاں وچ اک شخص کراچی لے جاندیاں ہویاں زخماں پاروں چل بسیا، ہُن تک جاں بحق افراد دی کل تعداد41ہوگئی اے۔اسسٹنٹ کمشنر بیلہ دے مطابق زیادہ تر جاں بحق افراد دیاں لاشاں مکمل طور اُتے سَڑگئیاں جنہاں دی شناخت لئی ڈی این اے ٹیسٹ دا عمل کیتا جائے گا۔ایس توں پہلاں حمزہ انجم نے خدشہ ظاہر کیتا سی کہ کوچ وچ سوار باقی دے45افراد جاں بحق ہوگئے نیں۔