پٹرول ودھنا:ساراکریڈٹ نواز شریف نوں جاندا اے: پرویز الٰہی

لہور(پنجابی میڈیاگروپ)سابق وزیر اعلی پنجاب چودھری پرویز الہی نال سابق وفاقی وزیر داخلہ بریگیڈئیر(ر)اعجاز شاہ نے ملاقات کیتی جس وچ سیاسی، ملکی تے معاشی صورتحال اُتے گل بات کیتی گئی۔ایس موقع اُتے چودھری پرویز الہی نے آکھیا کہ مریم نواز دی واپسی اُتے35روپے فی لیٹر پٹرول دی قیمت ودھا کے اسحق ڈار نے قوم نوں سلامی دتی اے، پٹرول دی قیمت ودھن داسارا کریڈٹ نواز شریف تے مریم نواز نوں جاندا اے،مہنگائی دا جن بے قابو ہوچکیا اے۔اوہناں نے آکھیا کہ حکومت نوں صرف انتقامی کاروائیاں توں فرصت نہیں، امن و امان دی صورتحال تباہ ہو چکی، جرائم تیزی نال وَدھ رہے نیں،انتظامی گورننس وی نہ ہون دے برابر اے، ڈویلپمنٹ منصوبیاں نال جیہڑے روزگار دے مواقع پیدا ہو رہے سن اوہ وی بند ہوگئے نیں۔ سابق وزیر اعلی چودھری پرویز الہی نے آکھیا موجودہ حکومت وچ بیروزگاری وَدھی اے، مہنگائی حکومت دے وَسوں باہر ہو گئی ہُن ایہ ملک ڈیفالٹ ول لیجا رہے نیں، قوم نوں مہنگائی دے عذاب وچ پھسا کے آن والیاں نوں عوام مسترد کر چکی اے۔