ماں بولی دیہاڑ دی تیاری دے سلسلے وچ
پنجاب قومی ستھ ولوں پنجابی اکٹھ

بیورو رپورٹ
21فروری اوہ تاریخ اے جس دن عالمی پدھر تے ماں بولی دیہاڑ منایا جاند ااے۔ اوس دن دنیا دی ہر قوم اپنی ماں بولی (مادری زبان) دی بہتری تے ودھا واسطے جتن کردی اے۔ پچھلے کئی ورھیاں توں پنجابی زباننال جڑیاں تنظیماں ماں بولی پنجابی دے ودھا واسطے ہر ورھے 21فروری نوں پنجاب دے صدر شہر لاہور وچ اک بہت وڈاپنجابی اکٹھ کر دیاں نیں۔ تاں جے ماں بولی پنجابی دا جائز تے قنونی حق اوہنوں مل سکے۔ پچھلے ورھے توں ایس کم وچ خاص طور تے تیزی آئی اے کیوں جے پنجابی زبان تحریک دے پردھاں ، کئی سیکڑے کتاباں دے لکھاری، پنجابی زبان دے ودھا لئی بنائے گے پنج اداریاں دے مالک محترم جناب الیاس گھمن جی اک نویں جذبے نال ایس کم دے موڈھی بنے نیں تے پنجابی زبان نال جڑیاں ساریاں تنظیماں نوں اک مٹھ کر کے اگے ٹرن لئی پریرنا دے رہے نیں۔ایسے پریرنا دا سِٹا اے کہ پچھلے ورھے 21فروری 2022نوں شیخوپورا وچ پنجابی زبان ، ادب، رہتل تے پنجابی صوفی شاعراں دے سنیہے نوں عام لوکائی تک اپڑائوں والی ادبی تنظیم پنجاب قومی ستھ دے پربندھ ہیٹھ اک پنجابی ریلی کڈھی گئی تے فر اوس ریلی دے 52رلتی اک جلوس دی شکل وچ لاہور پنجاب اسمبلی ہال دے سامنے اپڑے تے وڈے جلوس وچ شامل ہوئے۔
ایس ورھے اک واری فیر پنجابی زبان نال جڑیاں تنظیماں تے پنجابی اداریاں ولوں ماں بولی پنجابی دے حق وچ سیمینار، ریلیاں تے جلوساں دا پربندھ کیتا جا رہیا اے۔
انج تے پنجاب بھر دیاں پنجابی تنظیماں تے پنجابی ادارے ایس کم وچ برابر دے رلتی نیں۔ پر خاص طور تے لاہور توں پاکستان پنجابی ادبی بورڈ،پنجابی زبان تحریک،پنجابی وِرثا پاکستان، روز وار بھلیکھا، پنجاب ہائوس، پنجابی سنگت پاکستان ، پنجابی مرکز، روز وار لوکائی، روز وار پنجابی زبان،بال ادبی بورڈ تے مسعود کھدر پوش ٹرسٹ۔للیانی توں پنجابی کھوج گڑھ۔ قصور توں سانجھا ویہڑا قصور۔ ساہیوال توں لوک لہر شیخوپورا توں پنجاب قومی ستھ تے صفدر آباد (منڈی ڈھاباں سنگھ) توں پنجابی چونترا 21فروری نوں ماں بولی پنجابی دیہاڑ واسطے پر جوش نیں۔
ایس سلسلے وچ اج توں پہلاں پاکستان پنجابی ادبی بورڈ لاہور دے پربندھ ہیٹھ دو پنجابی اکٹھ ہو چکے نیں جہناں وچ پنجابی لکھاری تے پنجابی تنظیماں دے پردھاں وڈی گنتی وچ شامل ہوئے۔ اوہناں دوواں پنجابی اکٹھاں وچ کجھ صلاح مشورے وی ہوئے۔ اوہناں مشوریاں وچ خاص طور تے ایہ نیں:
-1ایس ورھے 21فروری 2023منگل والے دن پریس کلب لاہور دے سامنے سارے پنجابی پیارے اکٹھے ہو کے اپنی ماں بولی پنجابی دے حق وچ جلوس کڈھں گے ، تقریراں کیتیاں جاون گیاںتے ماں بولی پنجابی نوں سکولاں کالجاں وچ لازمی مضمون وجھوں پڑھائوں لئی پنجاب سرکار توں منگ کیتی جائے گی۔
-2پورے پنجاب دے ہر ضلعے وچوں پنجابی لوکائی نوں کھلا سدا دتا جائے گا کہ ایس اکٹھ وچ رلت کرے۔
-3اجوکے دور دی منگ مطابق سوشل میڈیا تے اک مہم چلائی جائے گی جہدے لئی اک کمیٹی بنائی گئی اے جہڑی ایس معاملے نوں چلائے گی ۔ اوس کمیٹی وچ چار ناں : جاوید پنچھی، علی عثمان باجوا، یوسف پنجابی تے جناب مدثر اقبال بٹ صاحب شامل نیں۔-4جہڑے سجن کالجاں وچ جا کے پرنسپلز تے پنجابی استاداں نال گل کر سکدے نیں اوہ کالجاں دے پرنسپلز نوں ایس گل تے راضی کرں گے کہ : 21فروری نوں اپنے کالج دے پڑھیار لاہور پریس کلب دے سامنے ہوں والے پنجابی اکٹھ وچ بھیجو!ایس سلسلے دا تیجا پنجابی اکٹھ 29جنوری2023 اتوار والے دن سویرے 10:00وجے پنجاب قومی ستھ دے پربندھ ہیٹھ فاطمہ جناح پبلک لائبریری کمپنی باغ شیخوپورا وچ کروایا گیا۔ جہدے وچ شیخوپورا توں وکھ وکھ مکتبہ فکر نال جڑے لوکاں نے رلت کیتی۔
ادبی تنظیم پنجاب قومی ستھ ولوں کروائے گئے ایس اکٹھ دی صدارت سینئر لکھاری، شاعر، کہانیکار، ریڈیو پاکستان دے ودھیا بلار، وارث شاہ عالمی ایوارڈ یافتا ، گورنمنٹ ہائر سکینڈری سکول کڑیال کلاں دے پرنسپل محترم جناب محمد منیر شیر وانی نے کیتی۔
سٹیج سکرٹری دی ذمے واری کالمسٹ و صحافی ، کوآرڈینیٹر پاکستان پاک برٹش آرٹس انٹرنیشنل محترم جناب ڈاکٹر ایم ایچ بابر نے نبھائی ۔ جدوں کہ مجمانی دی ذمے واری چیئرمین: پنجاب قومی ستھ جاوید پنچھی تے سیکرٹری نشرو اشاعت پنجاب قومی ستھمحترما ع ن زہرا نے نبھائی۔
ایس پنجابی اکٹھ دی کاروائی اللہ تعالی دے پاک کلام نال شروع کیتی گئی جہدی سعادت حافظ محمد حسنات منیر شیر وانی نے دے حصے آئی تے ہدیہ نعت رسول مقبول ۖ بارھویں جماعت وچ پڑھں والیاں دو بھیناں محترما عائشہ عبدالستار راناتے محترما فائزہ عبدالستار رانا نے پیش کیتا۔
عائشہ تے فائزہ دوواں بھیناں نوں اللہ تعالی نے کوئی ایسا خاص گں عطا کیتا کہ اوہناں توں نعت سندیاں سارے ماحول تے وجد تاری ہو جاندا اے۔
ایس توں بعد سٹیج سیکرٹری محترم جناب ڈاکٹر ایم ایچ بابر ہوراں نے اکٹھ وچ رلت کرن والے سجناں متراں نوں جی آیاں نوں آکھیا تے اکٹھ کرن دی وجھا وی دسی۔ اکٹھ دے رلتی اردو پنجابی شاعرتے کہانیکار سید نعیم گیلانی ہوراں نے گل بات کردیاں آکھیا کہ: کیوں نہ 21فروری والے دن ماں بولی دیہاڑ دی اہمیت دسں لئی شیخوپورا وچ اک ریلی کڈھی جائے۔ ایہدے نال شیخوپورا دی عام لوکائی نوں جاگرتی ملے گی۔ دوجا ایہ کہ شیخوپورا توں وی ماں بولی پنجابی دے حق وچ بھرویں واج اٹھے گی۔
صدر آل پاکستان میڈیا کونسل شیخوپورا رانا زاہد حسین نے گل کردیاں آکھیا کہ: ماں بولی پنجابی دے ودھا تے سکولاں کالجاں وچ پڑھائوں لئی جہڑا جتن پنجاب قومی ستھ کر رہی اے اوہ صلاہں جوگ اے۔ اسیں پچھلے ورھے وی لاہور والے وڈے پنجابی اکٹھ وچ گئے ساں ۔ ایس واری میں اپنے نال 20لوک ہور لے کے ماں بولی پنجابی واسطے 21فروری نوں پنجاب قومی ستھ دے موڈھے نال موڈھا لا کے کھلوتا ہوواں گا۔
ضلع کچہری شیخوپورا وچ کم کرن والے محترم کامران پاشا ہوراں نے وی پنجاب قومی ستھ دے ایس کم نوں نہ صرف صلاہیا سگوں 5جی ہور نال لے کے آئون دی حامی وی بھری۔
بارھویں جماعت وچ پڑھں والیاں دو بھیناں نے نہ صرف اکٹھ دے شروع ہوں تے نعت پڑھ کے ماحول تے وجد تاری کیتا سگوں 21فروری نوں 7سہیلیاں نوں نال لیائوں دی حامی وی بھری۔
صحافی و کالمسٹ ، بیوروچیف روزنامہ پاکستان پوائنٹ محترم جناب شیخ محمد طیب نے گل بات کردیاں آکھیا کہ:
پنجاب قومی ستھ نے جسراں اج توں پہلاں کالجاں وچ جا کے پنجابی صوفی سیمینار کروائے نیں ۔ اک واری فیر پنجاب قومی ستھ اوہناں کالجاں وچ جا کے کالج دے پڑھیاراں نال گل بات کرے تے عالمی ماں بولی دیہاڑ دی اہمیت دسدیاں سٹوڈنٹس نوں 21فروری والے دن ماں بولی پنجابی دے حق وچ واج چکن لئی پریرنا دے۔
سوشل ورکر محمد نصراللہ جوئیا ہوراں نے گل بات کردیاں آکھیا کہ : منیر خان شیر وانی تے جاوید پنچھی پنجابی زبان دے ودھا واسطے میرے ذمے جو ڈیوٹی لوئوں گے میں خشی نال قبول کراں گا تے 21فروری نوں اپنی ٹابری دے 5جی ماں بولی دیہاڑ دے اکٹھ وچ لے کے حاضر ہوواں گا۔پنجابی دے جگ دھمے عوامی شاعر ، پنجابی چونترہ (صفدر آباد) دے پردھاں تے وارث شاہ عالمی ایوارڈ لین والے محترم جناب ندیم افضل ندیم ہوراں گل کردیاں آکھیا:
پنجابی چونترا (صفدر آباد) ولوں سوشل میڈیا ٹیم دی نمائندگی وی کراں گا تے پنجابی سوشل میڈیا ٹیم جو ڈیوٹی لائے گی اوہ دلوں نبھاواں گا۔ اوہناں مزید آکھیا کہ: پوری دنیا وچ کھلریاں وڈیاں پنجابی تنظیماں نال میرے جنے وی تعلقات نیں اوہناں نوں ماں بولی پنجابی دے ودھا واسطے واج چکں لئی نہ صرف پریرنا دیواں گا سگوں 21فروری نوں اپنے خاندان دے 10بال وی نال لے کے پنجاب قومی ستھ دے حکم دی پالنا کراں گا۔
ندیم افضل توں بعد پنجاب قومی ستھ دے چیئرمین جاوید پنچھی نے گل بات کردیاں آکھیا کہ : ایس ورھے 21فروری نوں ماں بولی دیہاڑ بھر پور طریقے نال مناواں گے۔ ایس سلسلے وچ جو وی بھج دوڑ کرنی پئی ضرور کراں گے۔ اپنے ضلعے دے کالجاں وچ جا کے پڑھیاراں نوں دساں گے کہ ماں بولی بولنا، لکھنا، پڑھنا تے پڑھانااک لکھ چوی ہزار پیغمبراں دی سنت اے۔ کیوں جے اللہ تعالی نے سور ابراہیم دی چوتھی آیت وچ آپ فرمایا اے:
اساں ہر قوم وچ رسول گھلیا اوہناں (لوکاں) دی ای بولی بولن والا تاں جے اوہناں نوں ساڈا سنیہا صاف صاف دس سکے۔
اللہ تعالی نے جہڑا زور دے کے آکھیا اے کہ: ہر قوم وچ رسول گھلیا اوہناں لوکاں دی بولی بولں والا ایہ گل دسدی اے کہ ازل توں لے کے ایس دنیا تے جہنے وی نبی ، پیغمبر، رسول تے مرسل آئے اوہ سارے اپنی قوم دی بولی وچ ہی اوہناں نوں تبلیغ کردے سن۔ ایتھوں تک کہ ہر نبی نوں اوہناں دی ماں بولی وچ وحی آئوندی سی۔ ایہو وجھا اے کہ میں سمجھناں ماں بولی بولنا، لکھنا، پڑھنا تے پڑھانا اک لکھ چوی ہزار پیغمبراں دی سنت اے۔
ایس توں بعد ایس پنجابی اکٹھ دے پردھان محترم جناب محمد منیر شیروانی ہوراں دسیا کہ کنیڈا وچ اک پنجابی صوبا بن چکیا اے۔ تے آسٹریلیا وچ پنجابی زبان نوں دسویں وڈی زبان دا درجا مِل چکیا اے۔ آسٹریلیا دی سرکار نے قانون بنا دتا اے کہ ہر ہفتے وچ اک دن پڑھیاراں نوں اوہناں دی ماں بولی وچ پڑھایا جائے گا۔ اوہناں نے اک تجویز دیندیاں آکھیا کہ
جسراں پچھلے ورھے پنجاب سرکار نے سارے محکمیاں نوں اِک لیٹر جاری کیتا سی کہ ہر محکمے وچ 14مارچ نوں پنجاب دا رہتلی دیہاڑ منایا جائے گا۔ اوس دن کوئی اکٹھ کرں دی لوڑ نہیں سی پئی ۔ سگوں سکولاں ، کالجاں ، یونیورسٹیاں بلکہ پنجاب سرکار دے انڈر کم کرن والے ہر محکمے دے ہر دفتر وچ اک دن رہتل دیہاڑ منایا گیا سی۔ جے اوسے طرحاں پنجاب سرکار اک نوٹیفیکیشن جاری کر دے کہ پورے پنجاب وچ ماں بولی دیہاڑ سرکاری طور تے منایا جائے گا تے فر نہ صرف ساڈی ماں بولی پنجابی اک وار فیر زندا ہو جاوے گی سگوں نوجوان نسل وچ پنجابی بولی وچ پڑھن دا جذبا پیدا ہووے گا۔
اِک واری فیر دسدا جاواں کہ پنجاب قومی ستھ ولوں ماں بولی دیہاڑ دی تیاری دے سلسلے وچ کروائے گئے پنجابی اکٹھ دے رلتیاں نے ہن تک ماں بولی دیہاڑ اکٹھ تے ریلی واسطے شیخوپورا وچوں 82بندے اکٹھے کرن داوعدا کیتا اے۔ اوہناں رلتیاں نے ایہ وی آکھیا اے کہ جے اسیں سارے اپنے اپنے تھاں کوشش کریئے تے ایہ گنتی سو توں ودھ وی سکدی اے۔
آخر تے پنجاب قومی ستھ ولوں اکٹھ پربندھک کمیٹی نے اکٹھ دے رلتیاں نوں پر تکلف چائے پارٹی دتی۔ اس توں بعد دعائے خیر ہوئی تے پنجابی اکٹھ مک گیا