صابر رضا دے نال ”مٹھی دوزخ” دی مکھ وکھالی

ممتاز ملک

پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے پربندھ ہیٹھ منے پرمنے دانشور تے ادیب صابر رضا دے ناول ”مٹھی دوزخ” دی تقریب رونمائی ہوئی جہدی صدارت پروفیسر زبیر احمد نے کیتی۔ تقریب وچ دانشوراں’ ادیباں تے صحافیاں نے بھرویں رلت کیتی۔ اظہار خیال کرن والیاں وچ خالد مسعود خان، حامد المشرقی، نیلم احمد بشیر، سید کاشف رضا تے ڈاکٹر صغرا صدف شامل سن۔
صابر رضا نے اپنے ناول اتے تبصرہ کردیاں کہیا کہ اسیں اپنی اقدار’ روایتاں تے اخلاقیات دے حوالے نال زوال پذیر ہوندے جا رہے واں جہڑی اخلاقی اقدار ساڈے معاشرے دا طرۂ امتیاز ہوندیاں سن اوہناں نوں اسیں خیرباد کہہ دتا اے۔ ایہہ ناول لکھن دا مقصد وی ایسے متاع گم گشتہ دی تلاش تے احساس ذمہ واری پیدا کرنا اے کہ کیوں اسیں اپنے تابناک ماضی نوں بھلدے جا رہے واں۔
پروفیسر زبیراحمد نے کہیا کہ ایہہ گل خوش آئند اے کہ موجودہ دور وچ پنجابی زبان وچ ناول تے کہانی لکھن دا رجحان ودھدا جا رہیا اے۔ عالمی ادب دے تناظر وچ اپنے آپ نوں ڈھالنا بڑا ضروری اے۔ پلاک دا ہونا ساڈے لئی کسے نعمت توں گھٹ نہیں اے۔ نیلم احمد بشیر نے کہیا کہ مینوں ایس گل دی خوشی اے کہ پنجابی وچ لکھن والیاں دی تعداد وچ دن بدن وادھا ہوندا جا رہیا اے۔ صابر رضا نے اپنے ناول وچ زندہ جاوید کردار نوں شامل کر کے بڑا چنگا کم کیتا۔ ایس روایت اتے سانوں ساریاں نوں عمل کرنا چاہیدا اے۔ خالد مسعود خان نے کہیا کہ صابر رضا نال میرا تعلق پچھلے 25 ورھیاں اتے محیط اے۔اوہ جنون دی حد تک اپنے وطن نال پیا کردے نیں۔ اوہ جسمانی طور تے لندن وچ ہوندے نیں لیکن روحانی طور تے ہر ویلے پاکستان وچ رہندے نیں۔ لائل پوری ہون دے ناطے اوہ اپنی ماں بولی نال بے پناہ محبت کردے نیں۔
سید کاشف رضا نے کہیا کہ صابر رضا میرے لئی استاد دا درجہ رکھدے نیں۔ لندن وچ مینوں اوہناں دی ہمسائیگی دا وی شرف حاصل اے۔ میں عینی شاہد واں کہ ا یس ناول دی تکمیل وچ اوہناں نے اپنی کئی راتاں دی نیندر قربان کیتی اے۔ اوہ برطانیہ وچ ادبی محفلاں دی رونق نیں۔ حامد المشرقی نے کہیا کہ پنجابی ہون دے ناطے سانوں اپنی مادری زبان اتے کدی سمجھوتا نہیں کرنا چاہیدا۔ اسیں سکھاں نوں ویکھنے آں کہ اوہ کنی اپنی زبان نال محبت کردے نیں۔ جے اوہ اپنے بالاں نوں پنجابی سکھا سکدے نیں تے سانوں وی ہر حال وچ اپنے بالاں نال ماں بولی وچ گل بات کرنی چاہیدی اے۔
ڈاکٹر صغرا صدف نے کہیا کہ صابر رضا دا ناول ”مٹھی دوزخ” پنجابی ادب دے اندر اک انمول وادھا اے۔ ساڈی خواہش اے کہ اوہ ہور ایس طرحاں دا ادب تخلیق کر کے اپنی ماں بولی دی خدمت کردے رہن۔ ڈاکٹر صغرا صدف تے مداحواں ولوں صابر رضا نوں پھلاں دے تحفے پیش کیتے گئے۔ پروگرام دے شروع وچ منی پرمنی گلوکارہ امن علی نے صوفیانہ کلام پیش کرکے بھرویں داد وصول کیتی۔ تقریب وچ نظامت دے فرائض ڈاکٹر خاقان حیدر غازی نے سرانجام دتے۔