پِلاک دا پروگرام کلام شاعر بزبان شاعر

سید علی قیصر

پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے پربندھ ہیٹھ کلام شاعر بزبان شاعر پروگرام وچ صوفیہ بیدار نے اپنی شاعری سامعین نوں سنا کے بھرویںداد حاصل کیتی۔ صوفیہ بیداری دی شاعری دے اندر اپنی دھرتی دی رومانوی داستاناں دا رنگ بڑا نمایاں اے۔ اوہناں دی شاعری ایسے والدین لئی دعوت فکر اے جہڑے دِھیاں دی مرضی دے خلاف اوہناں نوں ویاہ جئے بندھن وچ بنھ کے اوہناں دی خوشیاں تے خواہشاں دا گلا دبا کے اپنا شملہ اچا رکھنا چاہندے نیں۔اوہناں دی شاعری وچ محبوب دے نال لنگھے حسین لمحیاں دی یاداں’ سماجی تے معاشرتی اقدار دے نام تے صنف نازک دے نال ناروا سلوک دا دکھ اوہناں دی شاعری نوں پرتاثیر بناندا اے۔ اوہناں نے اپنی شاعری دے اندر ہیر رانجھا’ سسی پنوں’ سوہنی مہینوال’ مرزا صاحباں تے دُوجی داستاناں نوں بطور تلمیحات استعمال کیتا اے۔ ڈائریکٹر جنرل پلاک’ ڈاکٹر صغرا صدف نے مہمان شاعرہ صوفیہ بیدار نوں پھل پیش کیتے تے کہیا کہ اوہناں دی شاعری ادب دے اندر اک انمول وادھا اے۔ میری دعا اے کہ اوہ اپنی شاعری دے سوہنے رنگ ایسے طرحاں بکھیردیاں رہن تے لوکاں نوں محظوظ کردیاں رہن۔