90 دناں وچ الیکشن ہونے چاہیدے نیں:لہور ہائیکورٹ
لہور ( پنجابی میڈیاگروپ) لہور ہائی کورٹ نے تحریک انصاف ولوں پنجاب وچ عام الیکشن دی تریخ نہ دین دے خلاف دائر کیتی گئی درخواست سماعت لئی منظور کرلئی ،گورنر پنجاب نوں بذریعہ سیکرٹری تے الیکشن کمیشن نوں نوٹس جاری کر کے 3 فروری تک جواب منگ لیا گیا ۔پچھلے دناں عدالت عالیہ وچ جسٹس جواد حسن نے پی ٹی آئی دی درخواست اُتے سماعت کیتی، جس وچ تحریک انصاف ولوں بیرسٹر علی ظفر نے دلائل دتے، سماعت دے دوران پی ٹی آئی دے جنرل سیکرٹری اسد عمر تے سابق سپیکر سبطین خان، میاں اسلم اقبال، شبلی فراز، علی ساہی وی کمرہ عدالت وچ موجود سن۔بیرسٹر علی ظفر نے دلائل وچ آکھیا کہ اسمبلی تحلیل ہون دے 90دناں دے اندر الیکشن ہونا ہندے نیں جدکہ گورنر پنجاب نے تاحال الیکشن دی تریخ دا اعلان نہیں کیتا، عدالت گورنر نوں الیکشن دی تریخ دا اعلان کرن دی ہدایت دے دتی ۔جسٹس جواد حسن نے ریمارکس دتے کہ میں ایس گل اُتے تہاڈے توں متفق ہاں کہ 90 دناں وچ الیکشن ہونے چاہیدے نیں سوال ایہ اے کہ الیکشن دی تریخ دا اعلان کون کر رہے نیں۔
