پشور: مسجد وچ بم دھماکہ،32افراد شہید ،147توں وَدھ زخمی

اسلام آباد/پشور(پنجابی میڈیا)صوبائی دار الحکومت پشور وچ پلس لائنز دے نیڑے واقع مسجد وچ بم دھماکے اندر32افراد شہید تے 147توں وَدھ زخمی ہوگئے جس وچ کئیاں دی حالت نازک اے جس پاروں شہیداںدی تعداد ودھن دا خدشہ اے، دھماکے پاروں عمارت دا اک حصہ وی ڈگ گیا، کئی افراد ملبے تھلے دَب گئے جدکہ صدر مملکت عارف علوی ، وزیر اعظم شہباز شریف ، صدرووزیراعظم آزاد کشمیر ،وزرائے اعلیٰ ، گورنز ،وفاقی وزیراں سنے سیاسی و مذہبی رہنماواں نے دھماکے دی شدید مذمت کردیاں ہویاں آکھیا اے کہ اللہ دے گھر نوں نشانہ بنان والے حملہ آوراں دا اسلام نال کوئی تعلق نہیں،پاکستان دے خلاف جنگ کرن والیاں نوں صفحہ ہستی توں مٹا دیاں گے۔ تفصیل دے مطابق پیر نوں دھماکا تقریباً 1وج کے 40 منٹ اُتے اوس ویلے ہویا جَد ظہر دی نماز ادا کیتی جا رہی سی، دھماکا شدید نوعیت دا سی جس پاروں مسجد دی چھت تے دیوار ڈِگ گئی،دھماکا مسجد وچ اوس ویلے ہویا جَد وڈی تعداد وچ افراد نماز ادا کررہے سن۔کمشنر پشور ریاض محسود نے موتاں دی تصدیق کردیاں ہویاں آکھیا کہ خود کش دھماکے وچ 32 افراد شہید ہوئے ، 147 شہری زخمی ہوئے ۔لیڈی ریڈنگ ہسپتال (ایل آر سی) دے ترجمان محمد عاصم نے دسیا کہ علاقے نوں مکمل طور اُتے سیل کر دتا گیا تے صرف ایمبولینس تے امدادی کماں وچ مصروف اہلکاراںنوں علاقے وچ داخل ہون دی اجازت دتی گئی۔کیپیٹل سٹی پلس افسر (سی سی پی او) پشور محمد اعجاز خان نے میڈیا نال گل بات کردیاں ہویاں آکھیا کہ دھماکے توں بعد مسجد دی چھت منہدم ہوگئی، کئی جوان اجے وی ملبے تھلے پھس ہوئے نیں تے امدادی کماں وچ مصروف ورکراں نے اوہناں نوں کڈیا۔اوہناں نے آکھیا کہ دھماکے دی نوعیت بارے اجے کجھ وی کہنا قبل از وقت اے، بارود دی بو آرہی اے تحقیقات جاری اے، جائزہ لین توں بعد وجہ دی تصدیق ہوسکے گی۔