فواد چودھری دی درخواست ضمانت کل تک ملتوی

اسلام آباد(پنجابی میڈیاگروپ)الیکشن کمیشن دے خلاف نفرت پھیلان دے کیس وچ پی ٹی آئی دے رہنما فواد چودھری دی درخواست ضمانت اُتے سماعت کل (بدھ ) تک ملتوی کر دتی گئی۔پچھلے دناں اسلام آباد دی مقامی عدالت نے اوہناں دا ہور 2 روزہ جسمانی ریمانڈ دین دی پروسیکیوشن دی استدعا مسترد کردیاں ہویاں اوہناں نوں جوڈیشل ریمانڈ اُتے جیل گھل دتا سی۔ڈسٹرکٹ اینڈ سیشن کورٹس اسلام آباد وچ الیکشن کمیشن دے خلاف نفرت پھیلان دے کیس وچ گرفتار فوادچودھری دی درخواست ضمانت بعداز گرفتاری اُتے سماعت ہوئی، ایڈیشنل سیشن جج فیضان حیدر گیلانی نے کیس دی سماعت کی۔فواد چودھری دے وکیلاں بابراعوان، علی بخاری ، فیصل چودھری تے الیکشن کمیشن دے وکیل سعد حسن وی عدالت دے روبرو پیش ہوئے، ایس موقع اُتے پی ٹی آئی رہنما زلفی بخاری، اعظم سواتی تے شہزاد وسیم وی عدالت وچ پیش ہوئے۔الیکشن کمیشن دے وکیل سعد حسن ولوں سماعت پرسوں تک ملتوی کرن دی استدعا کردیاں ہویاں آکھیا گیا کہ ساہنوں درخواستِ ضمانت دیاں کاپیاں دے دتیاں جان، درخواست ضمانت دیاں کاپیاں پڑھ کے کیس وچ حاضر ہونا چاہندا ہاں، ایس دوران وکیل بابر اعوان نے الیکشن کمیشن دے وکیل نال مکالمہ کیتا کہ تُسی اپنے لئی گل کرو، پروسیکیوشن ولوںگل نہ کرو۔وکیل بابر اعوان نے استدعا کیتی کہ پروسیکیوشن اج دلائل دے دین، الیکشن کمیشن دے وکیل کل دلائل دے دین جس اُتے جج نے ریمارکس دتے کہ نہیں، فوادچودھری دی درخواست ضمانت اُتے سب دے دلائل اک نال سناں گے۔