توشہ خانہ کیس: عمران خان اُتے فردِ جرم عائد کرن دا فیصلہ

اسلام آباد (پنجابی میڈیاگروپ)اسلام آباد دی مقامی عدالت نے سابق وزیر اعظم تے چیئرمین پاکستان تحریک انصاف عمران خان دے خلاف توشہ خانہ ریفرنس وچ فردِ جرم عائد کرن لئی 7 فروری دی تریخ مقرر کردتی ۔ڈسٹرکٹ اینڈ سیشن کورٹ وچ اسلام آباد دے ایڈیشنل سیشن جج ظفر اقبال نے توشہ خانہ ریفرنس وچ عمران خان دے خلاف فوجداری کارروائی دے کیس دی سماعت کیتی۔سماعت دے شروع اُتے عدالت نے پی ٹی آئی دے وکیل سید علی بخاری نال استفسار کیتا کہ عمران خان ولوں وکالت نامہ کیتھے اے؟الیکشن کمیشن ولوں وکیل سعد حسن نے آکھیا کہ وکالت نامہ اوس ویلے تک نہیں آسکدا جَد تک عمران خان خود نہ آون۔عمران خان دے وکیل نے آکھیا کہ اسیں پچھلی سماعت اُتے عمران خان دا میڈیکل سرٹیفکیٹ پیش کیتا سی ، ایس اُتے عدالت نے آکھیا کہ اج وکالت نامہ وی جمع کرادین۔