چودھری شجاعت ہی پارٹی صدر نیں ،الیکشن کمیشن
اسلام آباد (پنجابی میڈیاگروپ)الیکشن کمیشن آف پاکستان نے چودھری شجاعت حسین نوں پارٹی صدارت توں ہٹان دا فیصلہ مسترد کردیاں ہویاں اوہناں نوںعہدے اُتے برقرار رکھیا ۔ منگل نوںالیکشن کمیشن نے چودھری شجاعت نوں مسلم لیگ دی صدارت توں ہٹان دی درخواست اُتے محفوظ فیصلہ سنایا۔الیکشن کمیشن نے سینٹرل ورکنگ کمیٹی دا فیصلہ مسترد کردیاں ہویاں اپنے فیصلے وچ آکھیا اے سینٹرل ورکنگ کمیٹی دے فیصلے دی کوئی قنونی حیثیت نہیں جدکہ پارٹی دے مرکزی ترجمان تے سیکرٹری اطلاعات مصطفی ملک نے آکھیا اے کہ چوہدری شجاعت حسین ہی مسلم لیگ دے صدر سن ، ہیں تے رہن گے،اج حق وسچ دی فتح ہوئی اے۔تفصیل دے مطابق الیکشن کمیشن نے چودھری شجاعت دی درخواست اُتے محفوظ شدہ فیصلہ سنایا جس دے مطابق الیکشن کمیشن نے سینٹرل ورکنگ کمیٹی دا فیصلہ مسترد کردیاں ہویاں آکھیا کہ فیصلے دی کوئی قنونی حیثیت نہیں ۔سنٹرل ورکنگ کمیٹی ولوں چوہدری شجاعت حسین نوں پارٹی صدارت توں ہٹان دی کارروائی کالعدم قرار دیندیاں ہویاں فیصلہ کیتا گیا کہ چوہدری شجاعت دی پارٹی صدارت توں برطرفی پارٹی آئین دے متصادم اے۔فیصلے وچ مسلم لیگ (ق) دی سینٹرل ورکنگ کمیٹی داجاری کردہ پارٹی الیکشن شیڈول وی کالعدم قراردے دتاگیا۔
