آئی ایم ایف نال پروگرام مکمل کر ن لئی پُر عزم ہاں،اسحق ڈار

اسلام آباد (پنجابی میڈیا گروپ)وفاقی وزیر خزانہ سینیٹر اسحاق ڈارنے آکھیا اے کہ پاکستان بین الاقوامی مالیاتی فنڈ (آئی ایم ایف) دے نال پروگرام نوں مکمل کرن وچ پر عزم اے تے 9 ویں جائزہ دی تکمیل لئی آئی ایم ایف دے مشن دے نال مکمل تعاون کیتا جائے گا۔آئی ایم ایف دے وفد نے مشن چیف نتھن پورٹر دی قیادت وچ وزیر خزانہ اسحٰق ڈار نال ملاقات کیتی جیتھے وزیر خزانہ نے آئی ایم ایف وفد نوں دسیا کہ حکومت نے بجلی تے گیس سنے معیشت دے مختلف شعبیاں وچ اصلاحات داسلسلہ شروع کیتا اے۔وزیرخزانہ نے آئی ایم ایف دے وفد دا خیرمقدم کیتا تے پاکستان تے آئی ایم ایف دے درمیان دوستانہ تعلقات اُتے روشنی پائی۔وزیر خزانہ نے مالیاتی خلیج نوں گھٹ کرن ، ایکسچینج ریٹ دے استحکام تے معیشت دی بہتری لئی توانائی دے شعبے سنے قومی معیشت دے مختلف شعبیاں وچ اصلاحات لئی حکومت ولوں کیتے جان والے اقداماںتوں وفد نوں آگاہ کیتا۔