قربانی دا جذبہ تے حب الوطنی مشکلاں نال نبڑن دی طاقت دیندی اے: آرمی چیف

راولپنڈی: آرمی چیف جنرل قمر جاوید باجوہ آکھیا اے قربانی دا جذبہ تے حب الوطنی مشکلاں نال نبڑن دی طاقت دیندی اے۔

پاک فوج دے شعبہ تعلقات عامہ (آئی ایس پی آر) دے مطابق آرمی چیف جنرل قمر جاوید باجوہ نے کھاریاں دے نیڑے ٹریننگ ایریا دا دورہ کیتا۔

اوہناں نے پاک آرمی ٹیم سپرٹ مقابلیاں دا جائزہ لیا۔ آئی ایس پی آر دے مطابق مقابلیاں وچ کراچی کور دی ٹیم بہترین قرار پائی جد کہ بین الاقوامی ٹیماں وچ ترکی نے گولڈ میڈل حاصل کیتا۔

آرمی چیف دا کہنا سی وکھو وکھ ملکاں دے شرکاء نوں اک دوجے دے تجربات توں استفادہ دا موقع ملیا۔

مقابلیاں وچ پاک فوج دی 7ٹیماں تے پاک فضائیہ دی ٹیم سنے دوجے ملکاں دی ٹیماں شریک سن۔ مقابلیاں وچ جسمانی تے ذہنی صلاحیتاں سنے جنگی حربیاں دا مظاہرہ کیتا گیا۔

مقابلیاں دا مقصد انسداد دہشت گردی بارے اک دوجے دے تجربات توں استفادہ کرنا سی۔ ایس موقع تے اپنے خطاب وچ آرمی چیف آکھیا تربیت تے ٹیم ورک جواناں دا طرہ امتیاز اے۔

چیلنجاں دا ساہمنا کرن لئی اعلیٰ معیار تے ذہانت دی لوڑ اے۔