حکومت دی آئی ایم ایف دیاں شرطاں پوریاں کرن دی یقین دہانی

اسلام آباد( پنجابی میڈیاگروپ)حکومت نے آئی ایم ایف پروگرام نوں موثر طریقے نال بروقت مکمل کرن لئی عالمی مالیاتی فنڈ دیاں شرطاں پوریاں کرن دی یقین دہانی کرا دتی اے۔وفاقی وزیر خزانہ اسحاق ڈار نے فنانس ڈویژن وچ آئی ایم ایف مشن دے چیف نیتھن پورٹر دی سربراہی وچ آئی ایم ایف دے جائزہ مشن نال ملاقات کیتی جس وچ وزیر خزانہ نے یقین دہانی کرائی کہ پاور سیکٹر وچ اصلاحات لیائی جا رہی اے تے گیس سیکٹر وچ گردشی قرضے دے خطرے توں نمٹن لئی طریقہ کار وضع کرن لئی اک اعلی سطح دی کمیٹی تشکیل دتی گئی اے۔ وزارتِ خزانہ ولوں جاری اعلامیے مطابق ایس موقع اُتے آئی ایم ایف دی ریذیڈنٹ نمائندہ ایستھر پیریز روئیز، وزیر مملکت برائے خزانہ تے محصولات ڈاکٹر عائشہ غوث پاشا، ایس اے پی ایم برائے خزانہ طارق باجوہ، ایس اے پی ایم آن ریونیو طارق محمود پاشا، گورنر اسٹیٹ بینک جمیل احمد، سیکرٹری خزانہ، چیئرمین ایف بی آر، آئی ایم ایف وفددے ارکاناں تے فنانس ڈویژن دے سینئر افسراں رَلت کیتی ۔ اجلاس وچ توسیعی فنڈ سہولت تحت9ویں جائزے نوں پورا کرن لئی اقتصادی تے مالیاتی پالیسیاں تے اصلاحاتی ایجنڈے اُتے تبادلہ خیال کرن دے علاوہ تفصیلی جائزہ لیا گیا، وزیر خزانہ سینیٹر اسحاق ڈار نے وفد دا خیرمقدم کیتا تے آئی ایم ایف دے نال دیرینہ دوستانہ تعلقات دا اظہار کیتا۔اوہناں نے مشن نوںمالیاتی تے اقتصادی اصلاحات تے مختلف شعبیاں وچ حکومت ولوں کیتے جان والے اقدام بشمول مالیاتی فرق نوں گھٹ کرن، شرح مبادلہ وچ استحکام تے معیشت دی بہتری لئی توانائی دے شعبے وچ کیتے جان والے اقداماں توں آگاہ کیتا، وزیر خزانہ نے گل بات جاری رکھن اُتے آئی ایم ایف دے منیجنگ ڈائریکٹر دا شکریہ ادا کیتا۔وزیر خزانہ دا کہنا سی کہ بطور وزیر خزانہ اوہناں نے ماضی وچ آئی ایم ایف پروگرام نوں کامیابی نال مکمل کیتا اے، اوہناں نے یقین دہانی کرائی کہ حکومت موجودہ پروگرام نوں وی مکمل کرن لئی پُرعزم اے۔ اسحق ڈار نے مشن لئی اپنی حمایت نوں ہور ودھایا تے توسیعی فنڈ سہولت(آئی ایف ایف)دے تحت 9 ویں جائزہ نوں مکمل کرن لئی اک معاہدے تک پہنچن لئی مل کے کم کرن دا عہد کیتا۔آئی ایم ایف دے مشن چیف مسٹر ناتھن پورٹر نے ایس موقع اُتے اعتمادظاہر کیتا کہ حکومت9ویں جائزے نوں مکمل کرن لئی آئی ایم ایف دیاں ضرورتاں پوری کرے گی تے اُمید ظاہر کیتی کہ پاکستان مختلف شعبیاں وچ اصلاحات اُتے اپنی پیش رفت جاری رکھن دے نال نال آئی ایم ایف پروگرام نوں موثر طریقے نال بروقت مکمل کرے گا۔اوہناں نے آکھیا کہ آئی ایم ایف تے پاکستان مالیاتی اصلاحات اُتے مل کے کم کرن گے۔