مسلم لیگ (ق) دی سیاسی میدان وچ وڈی کامیابی، 13اہم رہنما پارٹی وچ شامل

لہور: جوڑ توڑ دے محاذ تے متحرک مسلم لیگ (ق) نے سیاسی میدان وچ بڑی کامیابی حاصل کردیاں 13اہم رہنماواں نوں پارٹی وچ شامل کر لیا اے۔

مسلم لیگ (ق) وچ شامل ہون والیاں وچ سابق وفاقی وزیر، سابق ایم پی ایز تے ٹکٹ ہولڈرز شامل نیں۔ ایہناں سارے رہنماواں نے قائم مقام گورنر پنجاب چودھری پرویز الٰہی نال ملاقات وچ شمولیت دا اعلان کیتا۔

فیصل آباد توں سابق وفاقی وزیر ٹیکسٹائل مشتاق احمد چیمہ، اوکاڑہ توں سابق ایم پی اے دیوان اخلاق، اوکاڑہ توں ای تعلق رکھن والے سابق ایم پی اے میاں اصغر علی جیویکا، سابق ٹاؤن ناظم سجاد حیدر، سمندری توں ٹکٹ ہولڈر قومی اسمبلی خالد محمود گل، صداقت خان لودھی، ضیا اللہ گجر، ریحان کسانہ، حاجی عبدالقادر، عارف چیمہ، عامر وڑائچ، ٹکٹ ہولڈر رائے قادر تے ٹکٹ ہولڈر خالد پرویز گل مسلم لیگ (ق)وچ شامل ہوئے نیں۔سیاسی رہنماواں دی مسلم لیگ (ق)وچ شمولیت دی تقریب گورنر ہاؤس لہور وچ منعقد ہوئی۔

چودھری پرویز الٰہی دا ساری شخصیات دا خیر مقدم کردیاں کہنا سی کہ نویں شامل ہون والیاں نوں بلدیاتی انتخابات وچ اہم عہدیاں تے میدان وچ اتارن دا فیصلہ کیتا اے۔اوہناں دا کہنا سی مسلم لیگ (ق) عوامی مسئلے حل کرن دی سیاست کردی اے۔

اسیں بلدیاتی میدان وچ بھرپور انداز توں اترن گے۔ ق لیگ الزام تراشی نہیں سگوں خدمت دی سیاست تے یقین رکھدی اے۔ اسیں نہیں ساڈے کم بولدے نیں، ق لیگ دا دور حکومت خدمت دا دور سی۔