شکر کرو پاکستان بچ گیا اے:مریم نواز

بہاولپور(پنجابی میڈیاگروپ)مسلم لیگ(ن)دی نائب صدر مریم نواز شریف نے آکھیا اے کہ ساہنوں جن حالات وچ ملک ملیا شکر کرو پاکستان بچ گیا اے، ایہ سمجھ رہے نیں کہ مسلم لیگ الیکشن توں گھبرارہی اے، سن لو میدان وچ اُتر چکے ہاں، الیکشن جَد وی ہون گے کلین سویپ کراں گے ۔ بہاولپور وچ تنظیمی کنونشن نال خطاب کردیاں ہویاں مریم نواز شریف نے آکھیا کہ نواز شریف نے لندن توں سلام گھلیا اے، جَد توں اقتدار سنبھالیا مخالفاں نے سمجھ لیا شائد(ن)لیگ خموش، کمزور ہو گئی اے کارکناں دا جذبہ ویکھ کے اینہاں لوکاں نوں کہندی ہاں کہ ہُن مسلم لیگ دی واری اے، نواز شریف نے رانا ثنا اللہ نوں لندن بلایا سی ، میاں صاحب نے آکھیا تنظیمی کنونشن دا آغاز بہاولپور توں ہوئے گا ۔ مسلم لیگ(ن) دی نائب صدر مریم نواز نے ہور آکھیا کہ پشور وچ قیمتی جاناںدا ضیاع ہویا، شہیداں دے اللہ تعالی درجات اُچے فرمائے، نوجواناں دی وڈی تعداد ویکھ کے بوہت خوشی ہو رہی اے، نوجوان میرا ہر اول دستہ ہون گے، نوجوان، عورتاں دے نویں ونگ تشکیل دتے جان گے، میرے عہدے دے حوالے نال بڑیاں گلیاں ہو رہیاں نیں، کارکناں دی محبت نال اے کسی عہدے دی محتاج نہیں۔مریم نواز نے آکھیا کہ عہدیاں دے بغیر وی کارکناںدے شانہ بشانہ ساں، کارکناں نے بُرے ویلے وچ نواز شریف دا ساتھ دتا، سلام کردی ہاں، جَد کوئی عہدہ نہیں سی تَد تے اج وی میری سب توں وڈی طاقت اے، موروثیت دیاں بڑیاں گلاں ہو رہیاں نیں، عوام دے پیار نوں موروثیت نہیں جمہوریت کہندے نیں، عمران دے 4 سالہ جبر دے دور وچ کارکناں نے ساتھ نبھایا جس دی مثال نہیں ملدی۔