اپنی ذمہ داری احسن طریقے نال نبھاواں گا:محسن نقوی

لہور(پنجابی میڈیاگروپ)نگران وزیر اعلی پنجاب محسن رضا نقوی نال برطانیہ دی ڈپٹی ہائی کمشنر زوویئر(Ms. Zoe Ware)نے ملاقات کیتی جس وچ باہمی دلچسپی دے امور، مختلف شعبیاں خصوصا تعلیم، صحت تے صحافیاں دی تربیت دے حوالے نال تعاون اُتے تبادلہ خیال کیتا گیا۔ایس موقع اُتے گل بات کردیاں ہویاں نگران وزیر اعلی محسن رضا نقوی نے آکھیا کہ برطانیہ پاکستان دا بہترین دوست ملک اے، برطانیہ دے نال اپنے تعلقات نوں بوہت اہمیت دیندے ہاں، پنجاب دے سماجی شعبیاں دی ترقی لئی برطانیہ دے تعاون نوں تحسین دی نظر نال ویکھدے ہاں، برطانیہ نال شراکت داری ہور ودھان لئی اقدامات کراں گے۔محسن رضا نقوی نے آکھیا کہ پاکستانی صحافیاں دی برطانوی اداریاں وچ جدید ٹریننگ داجائزہ لیا جائے، اوہناں دی تربیت لئی برطانوی معاونت دا خیر مقدم کراں گے،میڈیا دی تیزرفتار ترقی دے دور وچ جدید تربیت حاصل کرنا صحافیاں لئی ناگزیر اے، جس نال صحافی اپنے فرائض پروفیشنل انداز وچ سرانجام دے سکن گے، برطانیہ دے ساتھ مختلف شعبیاں وچ تعلقات نوں ہور ودھانا چاہندے ہاں ۔ نگران وزیر اعلی پنجاب نے آکھیا کہ الیکشن کمیشن دی گائیڈ لائنز دی روشنی وچ شفاف تے آزادانہ الیکشن دی ذمہ داری ملی اے، نگران حکومت منصفانہ الیکشن کران دی ذمہ داری بطریق احسن ادا کرے گی، پوری کوشش اے کہ عام آدمی دیاں زندگیاں وچ وَدھ توں ودھ آسانیاں پیدا کیتیاں جان۔