خیبرپختونخوا نوں اَت گردیی ختم کرن لئی417ارب روپے دتے،کیتھے گئے:وزیراعظم

اسلام آباد( پنجابی میڈیا گروپ)وزیراعظم شہباز شریف ہوراںآکھیا اے کہ خیبرپختونخوا نوں417ارب روپے انسداد دہشت گردی دی مد وچ دتے گئے، خدا جانے اوہ کیتھے خرچ کیتے گئے، کوئی نہیں جاندا ، اوہناں دا حساب دتا جائے کہ اوہ کیتھے گئے؟وفاقی کابینہ دے اجلاس وچ گل بات کردیاں ہویاں وزیراعظم شہبازشریف نے آکھیا کہ پشور دھماکہ افسوسناک اے،اَت گرداں دے خلاف قوم تے ادارے متحد تے اک آوازنیں ، بہادر تے غیور عوام دی ہمت نوں لفظاں وچ بیان نہیں کرسکدے۔وزیراعظم نے آکھیا کہ خیبر پختونخوا وچ10ورھے پی ٹی آئی دی حکومت رہی ، اینہاں10ورھیاں وچ وفاق ولوں417ارب روپے خیبرپختونخوا نوں ادا کیتے جاچکے نیں،417ارب روپے کیتھے استعمال ہوئے؟آکھیا جاندا اے کہ ساہنوں پیسے نہیں ملے لیکن اینہاں نوں سالانہ40 ارب ملے،اوہ پیسے کیتھے گئے؟وزیراعظم دا کہنا سی کہ ایہ پیسہ خیبر پختونخوا دی پلس تے سکیورٹی فورسز دی بہتری لئی استعمال ہونا سی ،خیبرپختون خوا نوںجنہے روپے ملے، کسی ہور صوبے نوں اینہے نہیں ملے، اوس دا حساب لینا ساڈا حق اے، اسیں الزام تراشی نہیں بلکہ حقائق دی بنیاد اُتے گل بات کررہے نیں ۔اوہناں نے آکھیا کہ سب صوبیاں نے این ایف سی ایوارڈ وچ خوشدلی نال ایہ اک فیصد خیبرپختونخوا نوں دین وچ رضامندی ظاہر کیتی لیکن اُوتھے اُتے پلس دی کول کوئی جدید اسلحہ نہیں ، آلات نہیں ، اینہاں دی تربیت نہیں ہوئی ، استعداد نہیں ودھی ، نیکٹا بنا ، سی آئی ڈی بنائی گئی ، ایس سب دے باوجود ایہ کہنا کہ صوبے کول فنڈز نہیں سن ایہ حقائق نوں مسخ کرن دے مترادف اے ۔ وزیراعظم نے آکھیا کہ خیبرپختونخوا دے سیاسی گھرانیاں نے اپنی جاناں دا نذرانہ د تا ، پاکستان دی سابق وزیراعظم بے نظیر بھٹو نے قربانی دی ، سول لائن مسجد وچ پلس افسراں ، اوہناں دے سنے اہلکار شہید ہوئے، ساڈے جواناں نے جس طرح شجاعت تے بہادری دی مثال قائم کیتی سی دنیا وچ اوس دی مثال نہیں ملدی ۔وزیراعظم نے آکھیا کہ اَت گردی دا ایہ ناسور دوبارہ سر چُک رہیا اے ، سوال پیدا ہندا اے، اوہناں نون کییہڑا واپس لے کے آیا، دوبارہ پاکستان دا امن خراب ہویا، کس طرح کے پی ات گرداں دے ہتھاں وچ چلا گیا، اگر اسیں فوری اقدام نہ کیتے تے ایہ ناسور پھیل جائے گا ، اسیں ایس اُتے اجتماعی بصیرت تے کوششاں نال قابو پاواں گے۔