عدالت نے فواد چودھری دی ضمانت منظورکر لئی

اسلام آباد( پنجابی میڈیاگروپ)الیکشن کمیشن دے خلاف نفرت پھیلان بارے کیس وچ رہنما پاکستان تحریک انصاف (پی ٹی آئی) فواد چودھری دی درخواست ضمانت منظور کر لئی گئی۔ فواد چودھری ولوں دائر درخواست ضمانت بعد از گرفتاری اُتے اسلام آباد دی مقامی عدالت وچ سماعت ہوئی۔دوران سماعت تفتیشی افسر نے کیس دا ریکارڈ عدالت وچ پیش کیتا، فواد چودھری ولوں وکیل بابر اعوان عدالت وچ پیش ہوئے۔ایڈیشنل سیشن جج فیضان گیلانی نے فریقیاں دے دلائل سنن توں بعد فواد چودھری دی ضمانت بعد ازگرفتاری دی درخواست منظور کر لئی، عدالت نے فواد چودھری نوں20ہزار دے ضمانتی مچلکے جمع کروان دا حکم دتا ۔ پراسیکیوٹر نے آکھیا کہ اخلاقی طور اُتے سب نوں احترام کرنا چاہیدا اے، اوہناں نے اینج بوہت بیان دے رکھے نیں،جس اُتے بابر اعوان نے آکھیا کہ ایس طرح تے سالوں سال فیصلیاں ول نہ جایا جا سکے گا ۔ایڈیشنل سیشن جج نے ریمارکس دتے کہ ایس شرط اُتے ضمانت دے رہیا ہاں کہ فواد چوہدری ایہ گل دوبارہ نہیں دہران گے ، پارلیمنٹیرینز نوں اینج دے بیان نہیں دینے چاہیدے ۔دوران سماعت، الیکشن کمیشن تے پراسیکیوشن نے فواد چوہدری دی ضمانت دی مخالفت کردیاں ہویاں ضمانت مسترد کرن دی استدعا کیتی سی۔