پشور دھماکے وچ سکیورٹی لیپس دی تحقیقات ہونی چاہیدی اے:وزیراعظم

پشور(پنجابی میڈیاگروپ)وزیراعظم میاں شہباز شریف نے آکھیا اے کہ ات گردی نوں ختم کرن تک چین نال نہیں بیٹھاں گے، پشور دھماکے وچ سکیورٹی لیپس دی تحقیقات ہونی چاہیدی اے، منفی گلاں انتہائی نامناسب نیں ۔پشور وچ وزیراعظم شہبازشریف دی زیر صدارت اپیکس کمیٹی دا اجلاس ہویا،جس وچ پشور پُلس لائنز مسجد دھماکے تے امن و مان دی صورت حال اُتے تفصیلی غور کیتاجارہیا اے۔اجلاس وچ وزیر داخلہ رانا ثنا اللہ ، کورکمانڈر، انسپکٹر جنرل خیبر پختونخوا تے ہوراں اداریاں دے سربراہواں رَلت کیتی۔وزیراعظم میاں شہباز شریف نے آکھیا اے کہ30جنوری نوں پشور وچ ات گردی دا ہولناک واقعہ پیش آیا جیتھے 1اَت گرد چیک پوسٹ توں لَنگدیاں ہویا پُلس لائنز وچ داخل ہویا تے مسجد وچ جا پہنچیا تے سانحہ آرمی پبلک سکول توں بعد 1ہور اندوہناک واقعہ پیش آیا۔شہباز شریف دا کہنا سی کہ ایس واقعے اُتے پوری قوم اشک بار اے تے سوال کردی اے کہ کجھ ورھے پہلاں ختم کیتی گئی ات گردی توں بعد ایہ واقعہ کنج پیش آیا تے پچھلے کجھ ہفتیاں تے مہینیاں وچ صوبے وچ ہور اوس دے واقعات رونما ہوئے۔وزیراعظم دا کہنا سی کہ2010 دے این ایف سی ایوارڈ تحت ہُن تک خیبر پختونخوا نوں 417 ارب روپے دتے گئے، ایہ سال دا 35 توں 36 ارب روپے بن دا اے کیتھے گیا؟ خیبر پختونخوا حکومت نوں وی فرانزک لیب تے سیف سٹی پروجیکٹ بنانے چاہندے سن