مشکل ویلے حکومت سنبھالن دا مقصد ملک بچانا اے،مریم نواز

لہور(پنجابی میڈیاگروپ)ساڈے قائد نواز شریف دی سیاست عوامی خدمت نال عبادت اے، مشکل ترین حالات وچ حکومت سنبھالن دا مقصد ملک نوںبچانا اے۔چیف آرگنائزر مسلم لیگ (ن)مریم نواز نے لہور دے سابق ممبران پنجاب اسمبلی نال ملاقات کیتی تے اوہناں نوں لہور وچ فعال کردار ادا کرن دا ٹاسک دتا ۔ایس موقع اُتے رَلتیاں نال گل بات کر دیاں لیگی رہنما مریم نواز نے آکھیا کہ پچھلے 4 ورھیاں وچ عوام نوں مہنگائی، بے روزگاری تے معاشی بدحالی دے سوا کجھ نہیں ملیا تے عمران خان اج وی اپنی نااہلی بچان لئی جھوٹ تے جھوٹ بول رہیا اے۔اوہناں نے آکھیا کہ عوام با شعور اے اوہ اینج دے عناصر نوں ہمیشہ لئی مسترد کر دیوے گی ، پارٹی نے ذمہ داری دتی اے، انشا اللہ تہاڈے ساریاں نال مل کے پارٹی نوں تے وَدھ مستحکم تے فعال کراں گی ۔ ملاقات کرن والیاں وچ صدر ملک سیف کھوکھر، خواجہ عمران نذیر، میاں مرغوب، حافظ میاں نعمان، رمضان صدیق بھٹی، کرنل ریٹائرڈ طارق، حبیب اعوان، اختر حسین بادشاہ شامل سن جدکہ لیگی ایم این اے عابد رضا وی اوتھے موجود سن۔