عمران نے پاکستان نوں نقصان پہنچایا، نہیں چھڈاں گے:مریم نواز

ملتان( پنجابی میڈیاگروپ)مسلم لیگ (ن) دی سینئر نائب صدر مریم نواز نے آکھیا کہ عوام دیاں مشکلاںویکھ کے ساہنوں بوہت دکھ اے، عمران نے پاکستان نوں ہر جگہ نقصان پہنچایا، اوس نوں نہیں چھڈاں گے۔ ملتان وچ ورکرز کنونشن نال خطاب کردیاں ہویاں مریم نواز نے آکھیا کہ ملتان دے شیراں نوں نواز شریف ولوں سلام، اج مقبوضہ کشمیر نال یکجہتی دا دن اے، کشمیر دیاں لازوال قربانیاں نوں وی سلام، نواز شریف، شہباز شریف نوں مہنگائی دا احساس اے، ساہنوں احساس اے لوکاں دے گھراں وچ مشکلاں نیں، میرا دل عوام دے نال دھڑکدا اے، سب جاندے نیں کہ ایہ مہنگائی کس پاروں اے۔مسلم لیگ (ن) دی سینئر نائب صدر نے آکھیا کہ بیٹے توں تنخواہ نہ لین اُتے نواز شریف نوں چُک کے باہر سُٹ دتا گیا، جَد وی نواز شریف دی حکومت آئی پاکستان نے ترقی کیتی، نواز شریف دی جَد وی حکومت آئی عوام نوں ریلیف دتا، پاکستان دی ترقی وچ نواز شریف دا ہتھ اے، نواز شریف دے4ورھیاں وچ بجلی، گیس تے چینی دی قیمت نہیں ودھی، جَد وی نواز شریف دی حکومت آئی وڈھے منصوبے لائے گئے۔اوہناں نے آکھیا کہ عمران خان دے معاہدے پاروں قیمتاں ودھانیاں پئیاں، اوہناں نوں ترقی کردا پاکستان ملیا سی کھنڈرات بنا کے چلا گیا، عمران خان نے پاکستان دے کونے کونے وچ تباہی مچائی، ویلا ویکھدیاں ہی گھڑی چوردی یاد آندی اے، ایس گھڑی چور نوں سیاست توں باہر سُٹنا ہوئے گا، شہباز شریف 12 وجے نہیں، صبح 6 وجے دفتر آندے نیں، اپنے گھر دی معیشت ٹھیک کر لئی ملک دی تباہ کردتی۔