عمران خان دی کال اُتے جیلاں بھر دیاں گے:فرخ حبیب

لہور(پنجابی میڈیاگروپ)پاکستان تحریک انصاف دے رہنما فرخ حبیب نے آکھیا اے کہ عالمی دنیا نوں کشمیر اُتے دہرا معیار چھڈ کے اقوام متحدہ دیاں قرارداداں مطابق اپنا کردار ادا کرنا چاہیدا اے۔لہور وچ میڈیا نال گل بات کردیاں ہویاں سابق وزیر مملکت اطلاعات فرخ حبیب نے آکھیا کہ5اگست دے بھارتی اقدام سب دے سامنے نیں، بھارت نے مقبوضہ کشمیر دا خصوصی سٹیٹس ختم کیتا، وادی اندر انسانی حقوق دی خلاف ورزی ہوئی ، لکھاں کشمیریاں نوں شہید کیتا گیا۔پاکستان تحریک انصاف دے رہنما فرخ حبیب نے ہور آکھیا کہ عمران خان نے کشمیر دے سفیر دا کردار ادا کیتا، اوہناں نے مقبوضہ کشمیر دے حوالے نال بھرپور کردار ادا کردیاں ہویاں اقوام متحدہ وچ مقبوضہ کشمیر دا مسئلہ چُکیا۔اوہناں نے آکھیا رجیم چینج دے بعد 2مہینیاں توں جہیڑے حالات نیں اوہ کسی توں ڈھکے چھپے نہیں ، پاکستان دیے معاشی و سیاسی ڈھانچے نوں تباہ کر دتا گیا اے، سازش توں بعد عمران خان دے ساتھیاںاُتے تشدد کیتا گیا، گرفتاریاں توں بعد برہنہ کیتا گیا تے ظلم دا نشانہ بنایا گیا۔فرخ حبیب نے ہور آکھیا کہ امپورٹڈ حکومت نے ظلم دی مثال قائم کیتی اے، صحافیاں اُتے وی تشدد کیتا گیا، عمران خان اُتے وی قاتلانہ حملہ کیتا گیا، بغیر نمبر پلیٹ ویگو روکن اُتے میرے اُتے ڈکیتی دا پرچہ دتا گیا، ساڈے قائد نے جیل بھرو تحریک دا اعلان کیتا اے، جَد وی کال دین گے تے ملک دیاں جیلاں بھر دیاں گے۔