حکومت امن قائم نہیں کر سکدی تے گھر چلی جائے:سراج الحق

پشور(پنجابی میڈیا گروپ)امیر جماعت اسلامی سراج الحق نے آکھیا اے کہ8فروری نوں امن مارچ وچ آئندہ دے لائحہ عمل دااعلان کرن گے۔پشور وچ پریس کانفرنس کردیاں ہویاں سراج الحق نے آکھیا اے کہ حکومت فتویاں دی بنیاد اُتے نہیں چلدی، علما کرام تے ہر جمعہ نوں امن قائم کرن دی گل بات کردے نیں،اگر حکومت امن قائم نہیں کر سکدی تے فیر گھر چلی جائے، قومی میڈیا نے پشور دھماکے دی بجائے فواد چودھری کیس نوں اہمیت دتی، اوہناں دی ترجیح اک دُوجے نوں ذلیل کرنا اے قوم نوں بچانا نہیں، معیشت تے امن اسلامی نظام دے بغیرٹھیک نہیں ہو سکدی۔امیر جماعت اسلامی نے ہور آکھیا کہ حکومت اگلے کسی حادثے دا انتظار نہ کرے، خیبرپختونخوا دے لوکاں وچ خوف وہراس اے، صوبے وچ حکومت نام دی کوئی چیز وکھائی نہیں دے رہی، ساڈیاں ہمدردیاں خیبرپختونخوا دی غیرت مند پلس دے نال نیں، اج پلس اپنے آپ نوں لاوارث سمجھ رہی اے۔