ترکیہ،شام زلزلہ:ہلاکتاں 4372ہوگئیاں

انقرہ(پنجابی میڈیا)ترکیہ تے شام وچ7.8شدت دے زلزلے نے تباہی مچا دتی ، رات گئے آن والے زلزلے نے لوکاںں نوں بچن داموقع ہی نہ دتا،کم و بیش اک ہزار توں وَدھ عمارتاں ملبے دا ڈھیر بن گئیاں،آفٹر شاکس دا سلسلہ وی کئی گھنٹے تک جاری رہیا، دوناں ملکاں وچ موتاں دی مجموعی تعداد4372ہوگئی اے۔المناک زلزلے پاروںترکیہ وچ2921تے شام وچ1451افراد جان دی بازی ہار گئے جدکہ15ہزار800 توں وَدھ افراد زخمی نیں ۔ ترکیہ وچ شدید زلزلے نال عمارتاں نوں وی شدید نقصان پہنچیا، زلزلے دے خوف نال لوگ سڑکاں اُتے نکل آئے، امریکی جیولوجیکل سروے دے مطابق زلزلے دی شدت7.8ریکارڈ کیتی گئی اے۔ترک میڈیا دے مطابق زلزلے دے شدید ترین جھٹکے اک منٹ تک محسوس کیتے گئے، زلزلے دا مرکز ترکیہ توں23کلومیٹر جنوب وچ سی،جدکہ گہرائی17.9کلومیٹر سی۔زلزلے نال کہرمان، عثمانیہ، ملاطیا، دریار بکر سنے10شہر وَدھ متاثر ہوئے،زلزلے دے جھٹکے قبرص، یونان، اردن، لبنان، جارجیا تے آرمینیا وچ وی محسوس کیتے گئے۔واضح رہے کہ ترکیہ وچ1939 وچ وی7.8 شدت دا زلزلہ آیا سی جس وچ30ہزار افراد زندگی دی بازی ہار گئے سن، ترکیہ وچ25سال دے دوران7یا ایس توں وَدھ شدت دے7زلزلے آئے۔