پشوروچ قیامت خیز سانحہ

اسد اللہ غالب

عمران خان نے بطور وزیراعظم دھمکی دتی سی کہ جے مینوں اقتدار توں کڈیا گیا تے میں بوہتا خطرناک ثابت ہوواں گا۔ انج لگ رہیا اے کہ اوہ ٹھیک ای کہہ رہے سن۔ پچھلے دناں پشور دی دی پلس لائنز دی جامع مسجد وچ خودکش دھماکہ ہویا جہدے وچ 100بے گناہ نمازی شہید ہو گئے۔ عمران خان ہمیشہ توں کھلے عام انج دے سنگین جرماں وچ ملوث گروپاں لئی ہمدردی دے بول بولدے آ رہے نیں۔ اوہ بڑے فخر نال اپنے آپ نوں طالبان خان وی کہندے نیں تے ایہہ گل وی بڑے فخریہ انداز وچ سینہ تان کے کہندے نیں کہ اوہناں نوں وار آن ٹیرر وچ پاکستان دی شمولیت پسند نہیں سی۔ اوہ ایہہ وی کہندے آ رہے نیں کہ ایہہ ساڈی جنگ نہیں سی شاید اوہ چاہندے نیں کی دہشتگرد پورے ملک اتے تسلط کر لین۔ اوہناں دی پارٹی صوبہ خیبر پختوانخوا وچ دس ورھے اقتدار وچ رہی۔ پاکستان وچ اوہنے اقتدار دے چار سال تک مزے اڈائے۔ ایہو اوہ ویلا اے جدوں طالبان لئی نرم گوشے دی وجہ نال عمران خان نے پاکستان توں مفرور طالبان لئی واپسی دا راہ کھولیا تے اوہ صرف اک صوبے وچ نہیں بلکہ پورے پاکستان وچ پھیل گئے۔ اوہ بلوچستان وچ دھماکے کردے نیں‘ کراچی وچ خون دی ندیاں بہاندے نیں۔ سوات تے پشور دے آسے پاسے بھتہ خوری تے ات گردی وچ ملوث ہوندے نیں۔ عمران خان بڑی معصومیت نال ایہہ سوال پچھدے نیں کہ جے طالبان اوہناں دے دور وچ پاکستان آ گئے سن تے فیر اوس ویلے اوہناں نے دھماکے کیوں نہیں کیتے؟ ایہدے تے اوہناں کولوں ایہہ سوال پچھیا جانا چاہیدا اے کہ جے اوہ اوسے ویلے دھماکے شروع کر دیندے تے فیر سارا کھیڈ کھل کے سامنے آ جاندا۔ انٹرنیٹ تے ایسی ویڈیوز موجود نیں جہناں وچ لوک کہہ رہے نیں کہ جے عمران خان نوں کجھ ہویا تے اوہ سب خودکش دہشت گرد بن جان گے۔
خدا کرے کہ میرے ایہہ سارے گمان غلط فہمی اتے مبنی ہون لیکن ایہہ حقیقت اے کہ پاک فوج نے اک ریکارڈ قائم کیتا سی کہ جدوں امریکہ تے نیٹو دی متحدہ فوجاں دنیا وچ دہشت گرداں دا قلع قمع کرن وچ نکام ہو گئیاں سن تے پاک فوج نے ضرب عضب تے کجھ دوجے فوجی آپریشناں دے ذریعے دہشت گردی دا پورے ملک توں پورا صفایا کردتا سی حتیٰ کہ قبائلی علاقیاں وچ ایس حد تک امن و امان قائم ہو گیاسی کہ اوہناں نوں خیبر پختوانخوا دا آئینی طور تے جغرافیائی حصہ بنالیتا گیا۔
دہشت گردی بے شک ساری دنیا لئی اک ناسور دی حیثیت رکھدی اے تاہم ایہہ پاک فوج نوں ای کریڈٹ جاندا اے کہ اوہنے اک منظم پلان دے تحت ایس ناسور نوں جڑ توں اکھاڑ سٹیا۔
ایتھے اک وضاحت بڑی ضروری اے کہ پاکستان وچ دہشت گردی وچ ملوث گروہ دا نام تحریک طالبان اے۔ ایہہ اپنے آپ نوں پاکستانی طالبان کہلاندے نیں۔ ایہناں وچ دنیا بھر دے دہشت گرد شامل نیں تے ایہناں نوں افغانستان وچ بھارت دی خفیہ ایجنسی را دہشت گردی دی مذموم کارروائیاں دی ٹریننگ دیندی رہی۔
طالبان دا دوجا گروہ اپنے آپ نوں افغان طالبان کہلاندا اے۔ ایہہ سارے لوک افغانستان دے شہری نیں۔ اوہناں نے سوویت یونین (روس) دے خلاف اک کامیاب جنگ لڑی تے اوہنوں نہ صرف اک شکست فاش توں دوچار کیتا بلکہ سوویت یونین دے ٹکڑے ٹکڑے ہو گئے۔ دیوار برلن ٹٹ گئی۔ مشرقی یورپ وچ کمیونزم توں آزاد ریاستاں قائم ہو گئیاں۔ ایہناں افغان طالبان نے نائن الیون مگروں نیٹو تے امریکی متحدہ افواج دے خلاف جنگ لڑی۔ بے شک ایہہ اک لمی جدوجہد سی۔ امریکی تے نیٹو فورسز جدید ترین‘ مہلک اسلحے نال لیس سن جد کہ افغان طالبان اوہناں دے مقابلے وچ نہتے سن لیکن دنیا نے ویکھیا کہ افغان طالبان نے پہلاں اک سپر پاور سوویت یونین دا دھڑن تختہ کیتا فیر دنیا دی واحد سپرپاور امریکہ تے اوہدے اتحادیاں نوں دھول چٹائی۔ سوویت یونین نے واپس مڑ کے نہ ویکھیا ۔امریکی فوج بھاگم دوڑ وچ اینی حواس باختہ ہو گئی کہ اپنے جدید ہیلی کاپٹر تے ٹینک چالو حالت وچ چھڈ کے فرار ہونا پیا۔ کجھ لوکاں نے اوہناں دے جہازاں دے پہیاں نال لٹک کے بیرون ملک جان دی نکام کوشش کیتی۔
امریکہ سمجھدا اے تے غلط طور تے سمجھدا اے کہ افغانستان وچ اوہدی شکست دا ذمہ وار پاکستان اے۔ اوہ پاکستان نوں بہرصورت مزہ چکھانا چاہندا اے۔ دوجے پاسے بھارت وی اپنے زخم چٹ رہیا اے۔ اوہدی وی کوشش اے کہ اوہ دہشت گرداں دے ذریعے پاکستان وچ اک واری فیر کھلبلی مچا دیوے۔ بھارتی نریندر مودی کھلے عام کہہ چکے نیں کہ اوہ بلوچستان‘ آزادکشمیر تے گلگت و بلتستان دے عوام نوں ایسے طرحاں حقوق دوان گے جیویں مشرقی پاکستان دے عوام نوں دوائے سن۔ اوہ تسلیم کردے نیں کہ 71 وچ ہر بھارتی نے بنگلہ دیش بنان دی سازش نوں کامیاب بنایا۔
ہن اک ستم ہور ایہہ ہویا کہ برسراقتدار افغان طالبان ایس ویلے تک ساری دنیا توں کٹے ہوئے نیں۔اوہناں نوں کسی ملک نے تسلیم نہیں کیتا۔ اوہناں دا سارا سرمایہ امریکی بینکاں وچ منجمد پیا اے۔ افغانستان دی معاشی حالت دگرگوں اے۔س یاسی حالات وی وگاڑ دی انتہا نوں پہنچے ہوئے نیں۔ لوک اپنا ڈھڈ پالن لئی اپنے جگر گوشیاں‘ بال تک ویچن تے مجبور ہوگئے نیں۔ ایس پس منظر وچ افغان طالبان کوئی ٹھوس خارجہ پالیسی وی تشکیل دین دے قابل نہیں رہے۔ پاکستان نے کئی واری اوہناں نوں کہیا اے کہ افغان سرزمین پاکستان دے خلاف استعمال نہیں ہونی چاہیدی اے لیکن طالبان حکومت وی کوئی ٹھوس یقین دہانی کروان دے موڈ وچ نہیں اے۔ہن تے خود افغان فورسز پاکستانی فوجی دستیاں اتے حملے کر رہیاں نیں۔ ایہہ صورتحال بڑی المناک اے کہ جہڑے افغانستان لئی پاکستان نے دو واری قربانیاں پیش کیتیاں نیں اوہ ہن پاکستان نوں اکھاں وکھا رہیا اے۔ بھارت نے افغان طالبان دی ڈھل مل پالیسی دی وجہ نال افغانستان وچ دہشت گردی دے اڈے فیر قائم کر لیتے نیں جہڑے پاکستانی سکیورٹی فورساں اتے متواتر حملے کردے رہندے نیں۔
ہن تے اوہناں نے بڑے گھنائونے جرم دا ارتکاب کیتا تے نمازیاں نال بھری اک مسجد نوں خودکش دھماکے نال اڈایا اے۔ وزیراعظم شہباز شریف تے آرمی چیف جنرل عاصم منیر نے دھماکے دی جگہ دا دورہ کیتا۔ ہسپتال وچ زخمیاں دی عیادت کیتی۔ شہدا نمازی افسراں دے خانداناں دی اعانت لئی 20,20لکھ روپے امداد دا اعلان کیتا اے۔
وزیراعظم نے اعلان کیتا اے کہ اسیں اک اک دہشت گرد نوں کچلن تک چین نال نہیں بیٹھاں گے۔ آرمی چیف نے وی کہیا کہ دہشت گرداں دی بزدلانہ کارروائیاں ساڈے عزم نوں متزلزل نہیں کر سکدیاں۔ اسیں اوہناں نوں کٹہرے وچ لیاواں گے۔ لوڑ ایس امر دی اے کہ جیویں اے پی ایس سانحہ مگروں قومی ایکشن پلان اتے قوم نے اتفاق رائے کیتا سی اج پشور وچ مسجد دا سانحہ وی ایسے قدر سنگین اے ایہدے اتے وی اک نیشنل ایکشن پلان تشکیل دتا جاوے۔